Kevin Durant është bërë basketbollisti i tetë në histori të Ligës NBA, që ka arritur shifrën e 30 mijë pikëve në sezone të rregullta.
Basketbollisti 36-vjeçar e arriti këtë shifër të martën mbrëma në humbjen 119:112 që skuadra e tij Phoenix Suns, e pësoi nga Memphis Grizzlies. Durant shënoi 34 pikë. Ai ka realizuar 30 mijë e tetë pikë në stinore të rregullta të NBA-së.
Durant i është bashkuar emrave si LeBron James, Kaeem Abdul-Jabbar, Karl Malone, Kobe Bryant, Michael Jordan, Dirk Nowitzki e Wilt Chamberlain, të cilët e kanë arritur këtë shifër.
Rekordin për pikë të shënuara në stinor të rregullt e mban LeBron James i LA Lakers, me 41 mijë e 623 pikë.
“Është nder i veçantë të jem në të njëjtën kategori si këta lojtarë që kanë shtyrë lojën para. Ky gjithmonë ka qenë synimi im…Të përmendem me këta emra, atëherë i bie se jam duke bërë diçka mirë”, tha Durant, raporton agjencia “AP”.
