Mesfushori Lindon Emërllahu edhe zyrtarisht është pjesë e skuadrës së Clujit nga Rumania.
Emërllahu, të martën është prezantuar te skuadra rumune, të cilës iu bashkua nga Ballkani I Suharekës.
“Lojtari më i mirë në Kosovë, në CFR Cluj”, ka shkruar skuadra nga Rumania në faqen e saj zyrtare për transferimin e Emërllahut.
Në njoftimin e Clujit, thuhet se është arritur marrëveshja me Ballkanin për transferimin e tij por nuk janë dhënë detajet tjera.
Megjithatë, thuhet se Cluji ka paguar 800 mijë euro për Emërllahun kurse Ballkani ka ruajtur 20 për qind të kartonit të tij për shitjen e ardhshme.
22-vjeçari largohet nga futbolli kosovar, në të cilin fitoi gjithçka që mund të fitohet në nivel klubesh, ku me Ballkanin u shpall tri herë kampion i Kosovës, si dhe fitoi një Kupë dhe një Superkupë.
Po ashtu, Emërllahu ka edhe 6 paraqitje me Kombëtaren e Kosovës për të cilën debutoi në muajin shkurt të vitit 2022.
“Të mirëpresim Lindon dhe të urojmë shumë suksese me fanellën tonë”, ka shtuar Cluji.
Vet Emërllahu në prezantimin e videos së tij, ka thënë se është tejet i lumtur që është pjesë e skuadrës së Clujit.
