Palestinezët në Bregun Perëndimor përballen me më shumë pengesa, trafik dhe mjerim që pas armëpushimit në Rripin e Gazës.
Më shumë pika kontrolli filluan të ngrihen midis qyteteve palestineze, duke ndarë Bregun Perëndimor dhe duke krijuar pika kontrolli që ushtria izraelite mund t’i mbyllë kur të dojë. Kalimet që kishin qenë të hapura 24/7 filluan të mbylleshin gjatë orëve të pikut të mëngjesit dhe të mbrëmjes, duke çrregulluar jetën e qindra mijëra njerëzve.
Ministri palestinez i Ekonomisë në një intervistë për AP deklaroi se janë përafërsisht 900 pika kontrolli në Bregun Perëndimor.
“Këto pika kontrolli arrijnë të bëjnë çdo gjë tjetër përveç arsyes që pretendohet që kanë, pra ajo e të ofruarit siguri Izraelit ose kontribuli në stabilitetin e vendit. Por në vend të kësaj ato shërbejnë si mjete presioni mbi popullsinë palestineze, dobësimin e ekonomisë palestineze dhe ndikimin në mirëqenien psiqike të njerëzve. “
Ai shtoi se qëllimi final I tyre është që t’i shtynë palestinezët të kërkojnë zgjidhje diku tjetër duke pas për qëllim zhvendosjen e tyrë nga vendi.”
Një banor i Jerichos që po priste të kalojë në njëren prej këtyre pikave të kontrollit tha se kishte një orë që po priste dhe nuk e dinte se kur do të mund të kalojë.
“ E tëra kjo është e padrejtë dhe gabim. Ne kemi gjëra për të bërë dhe duhet të kujdesemi për shtëpitë tona. Kjo s’është e drejtë dhe ne nuk kemi faj”, tha ai.
Që nga fillimi i luftës në Gaza, gjendja e palestinezëve në Bregun Perëndimor është keqësuar shumë, dhe që nga armëpushimi që u arrit në Gaza, ushtria izraelite ka bërë disa bastisje në Bregun e pushtuar, duke vrarë, bastisur dhe djegur prona të palestinezëve.
Vetëm nga fillimi i këtij viti janë vrarë 70 palestinezë në Bregun Perëndimor, sipas Ministrisë së Shëndetësisë palestineze.
