Presidenti amerikan Donald Trump ka thëne se ka zhvilluar një telefonatë me homologun e tij rus Vladimir Putin, për të diskutuar përpjekjet për t’i dhënë fund luftës Moskë-Kiev, sipas The New York Post.
Duke folur për The Post të premten, Trump deklaroi se Putini është i etur për të parë një fund të konfliktit.
“Ai dëshiron të shohë që njerëzit të ndalojnë së vdekuri”, tha Trump. “Të gjithë ata njerëz të vdekur. Të rinj, të rinjë, njerëz të bukur. Ata janë si fëmijët tuaj, dy milionë prej tyre – dhe pa asnjë arsye.”
Trump pohoi se lufta, tani në vitin e saj të tretë, “nuk do të kishte ndodhur kurrë” nëse ai do të kishte qenë president në vitin 2022.
Presidenti shprehu urgjencën për zgjidhjen e luftës dhe theksoi se ka një plan konkret për ta mbyllur atë. “Shpresoj të jetë shpejt. Çdo ditë njerëzit po vdesin. Kjo luftë është kaq e keqe në Ukrainë. Unë dua t’i jap fund kësaj gjëje të mallkuar.”
Ndërkohë, zëdhënësi i Kremlinit Dmitry Peskov u tha gazetarëve në Moskë të dielën se ai nuk mund të “as konfirmojë dhe as mohojë” raportin, duke thënë se komunikimi midis Rusisë dhe SHBA-së kryhet përmes kanaleve të ndryshme, raporton AA.
“Sigurisht, në sfondin e shumësisë së këtyre komunikimeve, unë personalisht mund të mos di diçka, të mos jem në dijeni për diçka. Prandaj në këtë rast nuk mund ta konfirmoj dhe as ta mohoj”, tha ai.
Trump ka propozuar një marrëveshje prej 500 milionë dollarësh me Ukrainën për të siguruar akses në mineralet dhe gazin e tokës së rrallë në këmbim të garancive të sigurisë në çdo marrëveshje të mundshme paqeje.
