Kuvendi i Shqipërisë ka votuar kundër rezolutës e cila e njeh dhe e dënon gjenocidin serb në Srebrenicë të Bosnjë e Hercegovinës.
Kërkesa e deputetit Tritan Shehu u rrëzua me votat e 51 deputetëve shqiptarë.
Pas votimit, ish-kryeministri Sali Berisha mori fjalën në Kuvend dhe i akuzoi deputetët e shumicës se votuan sipas urdhrit të Aleksandër Vuçiqit të cilin e quajti Putin i vogël.
“Shqipëria anti-shqiptar të tillë si Edi Ramën nuk ka pasur kurrë. Ju shkelmuat mbi gjakun e 8 mijë burrave dhe fëmijëve te pafajshëm të Bosnjës. Votuat duke shkelmuar mbi jetën e mbi 100 mijë shqiptarëve në Kosovë. Po çfarë mund të presësh nga një trafikant, eskortë trafikantësh. Ç’mund të presësh nga skllavi i Aleksandër Vuçiq? si mund të silleni si kope? Si mund të bëni ju shqiptarë një votim të tillë. Udhëheqësit aktual me në krye Aleksandër Vuçiq janë arkitektë të këtij gjenocidi. Kemi detyrim për të dënuar këtë denoncim”, tha Berisha.
Nga ana tjetër, kryetari i grupit parlamentar të Partisë Socialiste, Taulant Balla e akuzoi Berishën se ka furnizuar me naftë kontrabandë makinat serbe të Millosheviqit, përderisa e quajti atë tradhtarin më të madh të Kosovës.
“Ti ke përgjegjësi direkte se ke furnizuar makinerinë e luftës me naftë. Ky është fundi i botës dhe për disa këtu që kanë vënë firmën pa e ditur çfarë kanë firmosur. Ti nuk duhet të jesh në këtë sallë. Ti je kot fare dhe duhet të mbash përgjegjësi për këtë. Kjo është vepër penale që nuk parashkruhet. Kjo është një çështje që drejtësia duhet ta rihapë. Thyerja e embargos së Kombeve të Bashkuara duhet të hapet. Sa i përket luftës së Kosovës, mbetesh tradhtari më i madh”, tha Balla.
Ndërkohë Tritan Shehu në fjalën e tij tha se parlamenti i cili sot rrëzoi rezolutën për gjenocidin serb në Bosnjë, nesër nuk do ta pranojë të dënojë gjenocidin serb në Kosovë.
“Jemi parlamenti i vetëm që nuk ka një dokument të vendosur formal për të dënuar gjenocidin. Është një ditë e cila na vendos një damkë të rëndë para botës demokratike. Para disa ditësh këta zotërinjtë votuan kundër rezolutës për të dënuar gjenocidin rus në Ukrainë. Sot nuk pranuan rezolutën për të dënuar gjenocidin serb në Bosnje, nesër nuk do pranojnë të dënojnë gjenocidin serb në Kosovë. Pse? Se janë lidhjet, detyrimet, është Vuçiq matanë”, tha Shehu.
Masakra e Srebrenicës njihet si gjenocid nga Gjykata Ndërkombëtare e Hagës që nga viti 2004. Ky gjenocid i Serbisë mori jetën e mbi tetë mijë boshnjakëve myslimanë, kryesisht burra dhe djem.
Raporti i gazetares Jetmira Lushi.
