Një ish-kirurg, i cili akuzohet se ka abuzuar me qindra pacientë të rinj, shpesh ndërsa ata ishin nën anestezion, do të dalë në gjyq këtë muaj, e që do jetë gjyqi më I madh në lidhje me abuzimin e fëmijëve në historinë franceze.
Joel Le Scouarnec, 73 vjeç, akuzohet se ka sulmuar ose përdhunuar 299 fëmijë – shumica ish-pacientë të tij – midis viteve 1989 dhe 2014, kryesisht në Brittany.
Ai ka pranuar disa akuza, por jo të gjitha.
Gjyqi në Vannes, Franca veriperëndimore, pason një hetim të mundimshëm policor që zgjati disa vite.
Ka të ngjarë të ngrejë pyetje të pakëndshme nëse Le Scouarnec ishte i mbrojtur nga kolegët e tij dhe menaxhmenti i spitaleve që e kishin punësuar, pavarësisht nga një paralajmërim i FBI-së drejtuar autoriteteve franceze se ai kishte qenë duke u konsultuar me faqet e internetit të abuzimit të fëmijëve, pas së cilës iu dha vetëm një dënim me kusht.
Një numër i jashtëzakonshëm i mundësive për të ndaluar ish-kirurgun të ketë kontakt me fëmijët duket se janë humbur ose refuzuar.
Anëtarët e familjes së tij gjithashtu dinin për pedofilinë e Le Scouarnec, por nuk arritën ta ndalonin atë, thuhet.
“Ishte omertà e familjes që nënkuptonte që abuzimi i tij u lejua të vazhdonte për dekada,” tha një avokat i përfshirë në këtë çështje për BBC.
Le Scouarnec, dikur një kirurg i respektuar i qytetit të vogël, ka qenë në burg që nga viti 2017, kur u arrestua me dyshimin se kishte përdhunuar mbesat e tij, tani në të 30-at, si dhe një vajzë gjashtëvjeçare dhe një pacient të ri. Në vitin 2020 ai u dënua me 15 vjet burg.
Pas arrestimit të tij, policia kontrolloi shtëpinë e tij dhe gjeti kukulla seksuale të madhësisë së një fëmije, më shumë se 300,000 imazhe të abuzimit me fëmijë dhe mijëra faqe ditarësh të përpiluar në mënyrë të përpiktë, në të cilat Le Scouarnec dyshohet se kishte regjistruar sulmet që ai kreu ndaj pacientëve të tij të rinj për 25 vjet.
Ai ka mohuar të ketë sulmuar apo përdhunuar fëmijët, duke argumentuar se ditarët e tij thjesht detajojnë “fantazitë” e tij.
Megjithatë, në disa raste ai kishte shkruar edhe: “Unë jam pedofil”.
Le Scouarnec po përballet me më shumë se 100 akuza për përdhunim dhe më shumë se 150 akuza për sulm seksual, raporton BBC.
Disa nga ish-pacientët e tij, të cilët tani janë të gjithë të rritur, kanë thënë se kujtojnë se kirurgu i preku nën maskën e ekzaminimeve mjekësore, ndonjëherë edhe kur prindërit e tyre ose mjekë të tjerë ishin në dhomë.
Por për shkak se një numër i madh i viktimave të tij të supozuara ishin nën efektin e anestezisë kur pretendohet se kanë ndodhur sulmet, ata nuk i mbanin mend ngjarjet dhe u tronditën kur u kontaktuan nga policia dhe u thanë emrat e tyre – krahas përshkrimeve grafike të abuzimit – të shfaqura në ditarët e Le Scouarnec.
Le Scouarnec ndihej “i gjithëfuqishëm” dhe i pëlqente ndjenja e “flirtimit me rrezikun” përmes “shkeljeve të llogaritura”, e përditshmja franceze Le Monde citoi urdhrin e gjykatës kundër ish-kirurgut.
Disa nga viktimat e supozuara kanë thënë se zbulimet shqetësuese i ndihmuan ata të kuptonin simptomat e pashpjegueshme të traumës që i kishin rënduar gjatë gjithë jetës së tyre.
