Presidenti Donald Trump nënshkroi të shtunën një urdhër për të vendosur tarifa të ashpra mbi importet nga Meksika, Kanadaja dhe Kina, urdhër i cili pritet të hyjë në fuqi të martën.
Presidenti republikan postoi në mediat sociale se tarifat ishin të nevojshme “për të mbrojtur amerikanët”, duke i shtyrë tre kombet të bëjnë më shumë për të frenuar prodhimin dhe eksportin e fentanilit të paligjshëm dhe që Kanadaja dhe Meksika të reduktojnë imigracionin e paligjshëm në SHBA.
Trump shpalli një emergjencë ekonomike në mënyrë që të vendosë tarifa prej 10% për të gjitha importet nga Kina dhe 25% për importet nga Meksika dhe Kanadaja. Energjia e importuar nga Kanadaja, duke përfshirë naftën, gazin natyror dhe energjinë elektrike, do të taksohen me një normë prej 10%.
“Veprimet e ndërmarra sot nga Shtëpia e Bardhë na ndanë në vend që të na bashkojnë,” tha kryeministri kanadez Justin Trudeau, ndërsa njoftoi se vendi i tij do të vendoste tarifa 25% për deri në 155 miliardë dollarë në importet amerikane.
Presidenti i Meksikës urdhëroi gjithashtu tarifa hakmarrëse.
“Ne hedhim poshtë kategorikisht shpifjet e Shtëpisë së Bardhë se qeveria meksikane ka aleanca me organizata kriminale, si dhe çdo synim për t’u ndërhyrë në territorin tonë,” shkroi presidentja meksikane Claudia Sheinbaum në një postim në X, ndërsa tha se kishte udhëzuar sekretarin e saj të ekonomisë për të zbatuar një përgjigje që përfshin tarifa hakmarrëse dhe masa të tjera në mbrojtje të interesave të Meksikës.
Kryeministri i provincës kanadeze të Kolumbisë Britanike, David Eby, u bëri thirrje në mënyrë specifike banorëve që të ndalonin blerjen e pijeve nga shtetet “e kuqe” të SHBA dhe tha se po hiqte markat amerikane të alkoolit nga raftet e dyqaneve qeveritare si përgjigje ndaj tarifave, raporton AP.
Ministria e Punëve të Jashtme të Kinës tha se qeveria e vendit “e kundërshton fuqishëm këtë veprim dhe do të marrë kundërmasat e nevojshme për të mbrojtur të drejtat dhe interesat e saj legjitime”.
Me tarifat, Trump po respekton premtimet që janë në thelb të filozofisë së tij ekonomike dhe të sigurisë kombëtare. Por njoftimi tregoi seriozitetin e tij rreth kësaj çështjeje pasi disa aleatë të Trump e kishin minimizuar kërcënimin e taksave më të larta të importit si thjesht taktika negociuese.
Trudeau paralajmëroi për probleme ekonomike ndërsa tarifat hyjnë në fuqi dhe inkurajoi kanadezët të “zgjidhnin produktet dhe shërbimet kanadeze në vend të atyre amerikane”.
Por ai shprehu gjithashtu optimizëm në marrëdhëniet e qëndrueshme midis dy vendeve.
