Franca liroi bazën e saj të fundit në kombin e Afrikës Qendrore një ditë përpara afatit të caktuar nga autoritetet e Çadit, duke I dhënë fund kështu pranisë së saj ushtarake në Çad.
Ushtria franceze u tërhoq nga baza Sergent Adji Kossei në kryeqytetin N’Djamena, duke shënuar hapin e fundit në largimin e saj, thanë forcat e armatosura të Çadit në një deklaratë zyrtare. Baza ishte e fundit nga tre nën kontrollin francez.
Ministria e Jashtme e Çadit njoftoi në nëntor se po përfundonte bashkëpunimin ushtarak me Francën, duke bërë që Parisi të fillonte tërheqjen e trupave të tij. Marrëveshja dypalëshe, e nënshkruar fillimisht në 1978 dhe e rishikuar në 2019, u denoncua zyrtarisht nga qeveria e Çadit vitin e kaluar.
Përafërsisht 100 trupa franceze u larguan nga baza Abeche në Çadin lindor më 11 janar. Më pas, qeveria e Çadit i dha Francës gjashtë javë për të hequr 1000 ushtarët e mbetur dhe pajisjet e tyre, duke vendosur një afat deri më 31 janar, raporton AA.
Prezenca ushtarake e Francës në Afrikë ka qenë në rënie të vazhdueshme vitet e fundit, pasi disa vende i dëbuan forcat e saj. Përveç Çadit, trupat franceze janë dëbuar nga Mali, Nigeri dhe Burkina Faso.
Senegali dhe Bregu i Fildishtë kanë njoftuar gjithashtu plane për të larguar forcat franceze nga territoret e tyre.
Deri më tani, trupat franceze mbeten në Xhibuti dhe Gabon, dy vende që nuk kanë sinjalizuar ndonjë ndryshim në marrëveshjet e tyre me Parisin në lidhje me praninë ushtarake.
