Presidenti Donald Trump, që bëri deportimin e emigrantëve një pjesë qendrore të fushatës dhe presidencës së tij, tha të mërkurën se SHBA do të përdorë një qendër paraburgimi në Gjirin e Guantanamo, Kubë, për të mbajtur dhjetëra mijëra nga “të huajt më të këqinjë kriminelë”.
“Ne do t’i dërgojmë ata në Guantanamo,” tha Trump në nënshkrimin e Aktit Laken Riley.
Ai më vonë nënshkroi një memorandum presidencial dhe tha se do t’i udhëzonte zyrtarët federalë që të bënin gati objektet për të pritur emigrantë kriminelë në SHBA ilegalisht. Cari kufitar Tom Homan tha se Emigracioni dhe Zbatimi i Doganave të SHBA do të drejtonin objektin. Megjithatë, detajet e planit nuk ishin menjëherë të qarta.
Ndërsa baza detare amerikane në Kubë është e njohur më së shumti për të dyshuarit e sjellë pas sulmeve të 11 shtatorit 2001, ajo ka një strukturë të vogël, të veçantë që përdoret për dekada për të mbajtur emigrantët.
Qendra e Operacioneve të Migrantëve përdoret për njerëzit e kapur duke u përpjekur të arrijnë ilegalisht në SHBA me varkë. Shumica janë nga Haiti dhe Kuba.
Qendra zë një pjesë të vogël të bazës, përfshin vetëm një pjesë të vogël të ndërtesave dhe nuk ka kapacitetin për të strehuar 30,000 njerëzit që Trump tha se mund të dërgoheshin atje.
“Ne thjesht do të zgjerojmë atë qendër ekzistuese të emigrantëve, u tha Homan gazetarëve.
Qendra e ndalimit të emigrantëve funksionon veçmas nga qendra e paraburgimit të ushtrisë dhe sallat e gjyqit për të huajt e ndaluar nën Presidentin George W. Bush gjatë asaj që ajo administratë e quajti “lufta kundër terrorit”. Në atë objekt strehohen 15 të burgosur, përfshirë organizatorin e akuzuar të 11 shtatorit, Khalid Sheikh Mohammed, raporton AP.
Objektet e paraburgimit të emigrantëve në Guantanamo do të përdoren për “më të keqen nga më të këqijat”, thanë zyrtarët e administratës.
Sekretarja e Sigurisë Kombëtare Kristi Noem dhe Homan përdorën të dy frazën kur folën me gazetarët jashtë Shtëpisë së Bardhë.
Një zyrtar i administratës, duke folur në kushte anonimiteti sepse nuk ishin të autorizuar të flisnin publikisht për këtë çështje, tha se do të përdorej për të strehuar “kriminelët e rrezikshëm” dhe njerëzit që “është e vështirë të dëbohen”.
Trump ka folur vazhdimisht për rreziqet me të cilat përballen amerikanët nga rreth 11 milionë emigrantë që jetojnë ilegalisht në SHBA. Ndërsa emigrantët akuzohen rregullisht për kryerjen e krimeve të mëdha, ata janë një përqindje e vogël e popullsisë së përgjithshme. Studimet akademike të rishikuara në përgjithësi nuk kanë gjetur asnjë lidhje midis imigrimit dhe krimit të dhunshëm, megjithëse përfundimet ndryshojnë.
