Emisari amerikan për misione të veçanta Richard Grenell ka komentuar zhvillimet e fundit në Serbi, gati tre muaj pas nisjes së protestave të studentëve dhe qytetarëve për shkak të shembjes së një tende hekurudhore në Novi Sad më 1 nëntor 2024, në të cilën vdiqën 15 persona dhe disa të tjerë u lënduan.
Në një postim në platformën X, Grenell ka porositur protestuesit se është “gjithmonë e rëndësishme të ngrini zërin dhe të dëgjoheni”, por ka paralajmëruar se “të gjithë duhet të dënojnë dhunën dhe t’i përmbahen demonstratave paqësore.”
“Procesi demokratik duhet të respektohet. Ne nuk i mbështesim ata që minojnë sundimin e ligjit ose që marrin me forcë ndërtesat qeveritare. Nëse nuk ju pëlqen një ligj apo një udhëheqës, atëherë punoni për ta ndryshuar atë – por mos përdorni dhunën”, ka shkruar Grenell.
Presidenti i SHBA-së Donald Trump ka ngarkuar Richard Grenell që ta ndihmojë administratën e re amerikane me disa nga sfidat më të vështira të politikës së jashtme.
Grenell shërbeu si ambasador në Gjermani gjatë administratës së parë të Trump, i dërguar i posaçëm presidencial për negociatat e paqes Kosovë-Serbi, dhe kreu një detyrë si ushtrues detyre i drejtorit të inteligjencës kombëtare.
Ai ishte gjithashtu një pretendues për të shërbyer si sekretar i Shtetit, por Trump zgjodhi të emërojë senatorin nga Florida, Marco Rubio.
“Ric do të punojë në disa nga pikat më të nxehta në mbarë botën, duke përfshirë Venezuelën dhe Korenë e Veriut”, pati shkruar Trump në një postim në platformën e tij të mediave sociale, Truth Social, duke njoftuar emërimin.
Grenell mbeti pranë Trump pasi ai u largua nga detyra në vitin 2021, duke shërbyer ndonjëherë si këshilltar kryesor për politikën e jashtme. Ai ishte një mbështetës i hershëm i fushatës së Trump
në 2024 dhe mbajti ngjarje të shumta për kandidatin republikan të fokusuar në ekonomi dhe sigurinë kombëtare.
