Kryetari i Partisë Fjala, Gëzim Kelmendi, deklaron se ky subjekt politik nuk ka humbur për shkak të pozitës së tij që mban, por për shkak të mendësisë politike, që sipas tij, ekziston në Kosovës.
Kelmendi në emisionin “Këndi i Debatit” në Tëvë1 thotë se nuk po arrijnë të marrin votën e qytetarit, pasi që “frymon” ideja që ky subjekt politik është “parti e vogël dhe çdo votë për ta është votë e djegur”.
“Partia Fjala nuk ka humbur për shkak të kryetarit të saj, nuk ka humbur për shkak të shkeljeve të parimeve të saj, por ka humbur për shkak të një mendësie politike, që ekziston në vendin tonë e që na ka zënë tërthorazi dhe drejtpërdrejtë. Çka kanë thënë? Kanë thënë se ju jeni parti e vogël. ‘Ju nuk mund të fitoni’. ‘Ju nuk mund ta kaloni pragun’. ‘Dhënia e votës për ju është djegie vote – kështu që ne duhet të ia dhurojmë LVV-së’. Dhe, kështu ka ndodhur, prej 2017 e deri më tani. Neve nuk na kanë dhënë votën, pse Partia Fjala… nuk ka mbrojtur familjen, sa i përket kodit civil, edukimit, edukatës fetare, kundërshtimi i edukatës seksuale e shumë tjera tema që sot janë bërë publike – Partia Fjala ia ka mbrojtur në Parlamentin e Kosovës që një dekadë”, sqaroi kryetari i kësaj partie./teve1.info/
