Kryetari i SBASHK-ut, Rrahman Jashari së bashku me anëtarë të tjerë të Këshillit Qendror Grevist, gjatë vizitës në shkollën “Arsim Vokshi”, ka thënë se greva e sotme le të tingëllojë në veshët e qeverisë.
“Urojmë që greva e sotme të tingëllojë në veshët e qeverisë. Jemi të përgatitur për protestën më 20 maj, pas asaj SBASHK-u do të veprojë në bazë të kërkesave të të gjithë mësimdhënësve”.
“Ne kemi pas kërkesa radikale që të fillojmë me grevën e përgjithshme, e pikërisht për shkak të fëmijëve që mos t’i dëmtojmë kemi filluar me greva dhe protesta”, tha kreu i SBASHK-ut.
Sipas tij, deklaratat e Qeverisë se po u dhimbsen nxënësit janë false.
“Deklaratat e Qeverisë që po na dhimbsen nxënësit janë fallco, janë vetëm sa për të krijuar nervozë të prindërit. Nëse i dhimbem nxënësit dhe mësimit le të ulen me sindikatat dhe të gjejnë zgjidhje, e jo të dalë në televizion e të thonë që me grevë po humb mësimi sepse ne e dimë që humb mësimi”, tha më tej ai para mësimdhënësve.
Ai po ashtu u ka thënë mësimdhënësve që më 20 maj të jenë më shumë në protestën para Qeverisë.
“Ju lus që më 20 maj të jemi më shumë para qeverisë dhe ata të ulen dhe të gjejnë zgjidhje për situatën tonë. Uroj që të mos takohemi më në situata e të tilla, e të vijmë për lajme më të mira”, tha Jashari. /teve1.info/
