Një gjykatë holandeze urdhëroi të mërkurën qeverinë e vendit të përmbushë objektivat e saj për reduktimin e emetimeve të përgjithshme të azotit deri në vitin 2030, një vendim që mund të ketë pasoja të mëdha ekonomike dhe politike.
Gjykata e Qarkut të Hagës kritikoi mungesën e planeve të qeverisë për të trajtuar krizën e ndotjes dhe tha se brenda pesë viteve, gjysma e zonave të mbrojtura natyrore të vendit nuk duhet të kërcënohen më nga ndotja e azotit nga bujqësia, ndërtimi dhe burime të tjera.
Në shtator, koalicioni holandez në pushtet, i dominuar nga Partia për Liri e ekstremit të djathtë, anuloi një marrëveshje të negociuar nga qeveria e mëparshme. Qeveria aktuale nuk ka qenë në gjendje të bie dakord për një plan zëvendësues.
Javën e kaluar, kryeministri Dick Schoof njoftoi se do të krijojë një komitet ministror për të dalë me zgjidhje.
“Është padyshim një fitore pas dekadash mosveprimesh. Mendoj se ky verdikt tregon se planet e kabineteve të mëparshme janë të pamjaftueshme dhe tani ata absolutisht duhet të dalin me një plan,” u tha gazetarëve Hilde Anna de Vries nga Greenpeace pas seancës gjyqësore.
Nëse qeveria nuk arrin të përmbushë objektivin, ajo duhet të paguajë një gjobë prej 10 milionë eurosh (10.4 milionë dollarë) për Greenpeace, raporton AP.
“Masat e nevojshme për të arritur objektivat e azotit për vitin 2030 do të kenë një ndikim të paprecedentë në sektorin bujqësor, ndërtimin e banesave dhe ekonominë holandeze në tërësi”, tha në një deklaratë kryetari Ger Koopman.
Të dyja palët kanë gjashtë javë për të apeluar.
Sipas rregullave të Bashkimit Evropian, vendi duhet të reduktojë në mënyrë drastike emetimet e oksidit të azotit dhe amoniakut pranë zonave të natyrës që janë pjesë e një rrjeti habitatesh të mbrojtura për bimët dhe kafshët e egra të rrezikuara në të gjithë bllokun 27-vendesh.
Megjithëse grupet mjedisore kishin bërë presion për reduktimin e azotit për vite me radhë, një vendim i gjykatës më të lartë administrative të vendit në vitin 2019 ndaloi lejet e ndërtimit pasi gjyqtarët arritën në përfundimin se përjashtimet nga rregulloret e ndotjes shkelnin rregullat e BE-së.
Industria bujqësore u bë fokusi i kërkesave për reduktim. Në vitin 2022 mijëra fermerë vozitën traktorë nëpër rrugët e Hagës për të protestuar ndaj propozimeve të qeverisë së mëparshme për të frenuar emetimet. Ata argumentuan se sektori bujqësor ishte në shënjestër të padrejtë ndërsa industritë e tjera që kontribuonin në emetimet, si aviacioni dhe ndërtimi, u përballën me rregulla më pak të gjera.
