Lëvizjet i bëjnë të shpeshta duke monitoruar situatën.
Jo vetëm mbi urën e Ibrit, pjesëtarë të KFOR-it tash do të shihen më shumë në katër komunat veriore së bashku me Policinë e Kosovës.
Kjo pasi Aleanca Ushtarake NATO, ka vendosur të rrisë numrin prej 200 ushtarakëve Italian në Kosovë, siç thuhet, për të ruajtur stabilitetin dhe sigurinë para zgjedhjeve të 9 shkurtit.
Zëvendësdrejtori i policisë për rajonin e veriut, Veton Elshani tha se po vazhdon koordinimi me KFOR-in dhe janë marrë masat e sigurisë.
“Nuk është ndonjë befasi që numri i policëve shtohet ose zbritet është shtu numri i policëve në veri të vendit sidomos pas shpërthimeve të fundit dhe rasti i Iber-Lepencit, ndërsa sa i përket KFOR-it unë nuk mund të flas për shtimin e numrit ttë tyre. Atë çfarë mund të them është që ne kemi një bashkëpunim shumë të mirë me ta sidomos në zonën kufitare. Kemi patrullime të përbashkëta të koordinime dhe sinkronizuar”.
Arben Dashevci ekspert i sigurisë, tha se rritja e pjesëtarëve të KFOR-it tregon se vëmendja është për të rritur sigurinë bashkë me Policinë e Kosovës.
“Policia e Kosovës dhe instancat e sigurisë e kanë kapacitetin e plotë për veprim në çdo territor të Republikës së Kosovës, mirëpo në çdo shtim në këto situata të caktuara vetëm sa e siguron sigurinë duke pas parasysh sa shumë e kemi luftuar pasigurinë në këtë shtet këtë e shoh si mbarëvajtje të qetësisë, lirisë, demokracisë dhe të votohet lirshëm si në çdo vend të Bashkimit Evropian”, ka deklaruar ai.
Masat e sigurisë edhe nga ana e policisë u morën për të parandaluar çdo sulm të mundshëm pas atij të kanalit kryesor në Ibër – Lepenc në Varage të Zubin Potokut.
