Kandidate për deputete nga radhët e LDK-së, Fatlume Jaha ka thënë se nuk i gjykon vendimet e ZPAP-së në lidhje me gjobën që i është shqiptuar LDK-së për gjuhën e ashpërsuar gjatë fushatës zgjedhore.
Jaha thotë se LDK ka dilema në lidhje me madhësinë e gjobave që ka shqiptuar Paneli Zgjedhor për Ankesa dhe Parashtresa.
“Në fakt ne nuk i gjykojmë vendimet e ZPAP-së, meqenëse besojmë shumë në pavarësinë e këtij institucioni, natyrisht ne kemi dilemat tona në lidhje me madhësinë e gjobave që po japin ky institucion dhe për atë ne do të shkojmë dhe do të bëjmë konform rregullave që ka ky institucion ndërkohë që ne jemi kudo që shkelet ligji ne i qëndrojmë parimeve tona”, ka deklaruar Jaha në emisionin “Ditari” në tëvë1.
Derisa, Jaha ka akuzuar Kurtin për përdorimin e gjuhës së urrejtjes në fushatë si dhe ka kritikuar për mungesën e realizimit të projekteve për përmirësimin e jetës së qytetarëve.
Madje, sipas Jahës, Kurti është prijatar i listës së thyerjeve dhe ofendimeve kundër kandidatëve të tij për kryeministër.
“Ne për dallim nga Qeveria aktuale asnjëherë nuk tentojmë që t`i amnistojmë shkeljet e mundshme por konsideroj që tashmë është i ditur për qytetarët e Kosovës, se njeriu i cili që më së shumti është duke ofenduar dhe fyer gjatë këtyre ditëve të fushatës siç e përmenda edhe më herët në mungesë të punëve që nuk i ka kryer dhe argumenteve për asnjë projekt që e ka përmirësuar jetën e qytetarëve nuk e ka bërë, pra është kryeministri aktual Albin Kurti. Kurti i cili është prijatar i listës pra për thyerje dhe ofendime që po i bënë kundër kandidatëve të tij e në rastin konkret me një ritëm më të shtuar për LDK-në”, shtoi ajo./teve1.info/
