Të mërkurën, ka përfunduar kampi stërvitor i organizuar nga Federata e Futbollit të Kosovës (FFK) për futbollistët kandidatë potencial për Kombëtaren A.
Gjatë këtyre ditëve, futbollistët kanë pasur mundësinë të punojnë me selektorin e Kombëtares A të Kosovës, Franco Foda dhe stafin e tij, duke treguar aftësitë e tyre dhe duke e njohur nga afër filozofinë e lojës së trajnerit gjerman.
Krahas stërvitjeve taktike e teknike, puna në këtë kamp stërvitor u përqëndrua edhe në analiza të ndryshme kurse bashkëpunimi dhe atmosfera pozitive mes lojtarëve ishin në nivelin më të lartë.
Me përfundimin e kampit, i cili nisi të dielën, lojtarët u shprehën të kënaqur jo vetëm me organizimin e tij por edhe metodologjinë e punës së selektorit Foda.
Ata insistuan se ky kamp do ti motivojë për të vazhduar të punojnë me përkushtim në arritjen e synimeve që një ditë ta përfaqësojnë Kosovën në nivelet më të larta.
Mesfushori i Prishtinës, Gentrit Salihu, ka pranuar se është ëndërr e secilit futbollist për të qenë pjesë e “Dardanëve”.
Ky grumbullim ishte i rëndësishëm edhe për Erlis Xhemajlin, i cili është pjesë e Dukagjinit të Klinës.
Grumbullimi i radhës për Kombëtaren A, do të mbahet në muajin mars, në kuadër të përgatitjeve për ndeshjet e plejofit kundër Islandës në kuadër të Ligës së Kombeve.
Duelet me Islandën, kanë rëndësi të madhe për “Dardanët”, të cilën synojnë ngjitjen në Ligën B të Ligës së Kombeve.
