Fluksi i mërgimtarëve që po dilnin nga Kosova ishte shtuar gjatë ditës së diel.
E ky fluks bëri që kolona të jetë disa kilometershe.
“Valla qe tre orë kështu”, shprehet Driton Berisha.
E njëjtë sikur ky qytetar, priste edhe Jetmir Zhuniqi.
“Tash tri orë i kemi”, thotë ai.
Megjithatë, ai thotë se tashmë ishte mësuar me pritjen, sepse kishte pritur edhe në të kaluarën.
“Kemi prit 6 orë për me hy në Kosovë, e 5 orë në Kroaci, kështu është s’kemi çka me bo duhet me prit sikur krejt”, shprhet Zhuniqi.
Ndërsa kishte edhe nga ata mërgimtarë që kishin pritur më pak e që ishin edhe me pritjen.
“Kësaj here kemi pas veç një orë e gjysmë deri tash jemi të kënaqur, nuk kemi çka me bo duhet me kanë të kënaqur”, thotë Haxhi Mustafa.
Kurse përveç pritjes prej më shumë se dy orësh, Leutrim Demiri tregoi edhe problemet e tjera që po has.
“Vështirësi shumë po na shkakton gjithashtu edhe lodhje. Por problemi është vështirësi pak për tualetet publike për këso gjërash familjare, se me fëmijë të vegjël nuk po kemi ku me i qit fëmijët për nevoja as hiç”, shprehet Leutrim Demiri.
Ndërsa, sipas përditësimit të fundit të Qendrës Kombëtare për Menaxhim Kufitar, pritjet në pikën kufitare në Merdarë janë deri në 3 orë.
Pritje gjithashtu vazhdon të ketë edhe në pikën kufitare Dheu i Bardhë, deri në dy orë.
Pritjet për të dalë nga Kosova kishte edhe në Jarinjë e Mutivodë.
