Kryeprokurori i Prokurorisë Speciale, Blerim Isufaj iu ka bërë thirrje të gjithë institucioneve përfshirë Qeverinë e Kosovës që të tregojnë përkushtim ndaj sundimit të ligjit dhe siç tha ai të shmangin retorikën që synon politizimin e drejtësisë.
I pyetur për deklaratën e Kurtit, ai tha se nuk i intereson dhe se çdo person para ligjit është i njëjtë.
“Së pari dua të ju them se ligji është i njëjtë për të gjithë qytetarët e Republikës së Kosovës, përfshirë edhe për zyrtarët e lartë shtetërore… çdo person që ftohet ka përgjegjësinë ligjore me institucionin e drejtësisë. Prandaj iu bëjë thirrje të gjithë institucioneve përfshirë Qeverinë e Kosovës që të tregojnë përkushtim ndaj sundimit të ligjit dhe të shmangin retorikën që synon politizimin e drejtësisë. Nuk jam këtu për të komentuar deklaratat e askujt, se fare nuk më interesojnë, po flas për atë që unë e ndij dhe mendoj që duhet bërë”, ka deklaruar Isufaj në konferencë për media.
Tutje ai tha se Prokuroria Speciale nuk është për të bërë skenare dhe se nuk ka informacione se ka ndodhur ndonjëherë intervistim në zyrën e kryeministrit, shkruan teve1.info
“Prokuroria Speciale nuk është për të bërë skenare, ne punën tonë e kemi të përcaktuar me ligj dhe Kushtetutë ku edhe nuk bëjmë dallime as nga pozita, as nga emri. Unë me sinqeritetin më të madhe mund të them se nuk kam informacione se dikush është intervistuar në zyrën e kryeministrit, ndoshta edhe mund të ketë por unë nuk di. Të paktën që unë po bëhen 5 vite, situate të tilla nuk kemi pasur”, ka thënë ai.
Isufaj tha se deklaratat “denigruese dhe fyerjet publike ndaj prokurorëve” minojnë integritetin e sistemit të drejtësisë dhe “e cenojnë edhe besimin e publikut në sundimin e ligjit.
“Deklaratat denigruese dhe fyerjet publike ndaj prokurorëve dhe institucioneve të prokurorisë jo vetëm që minojnë integritetin e sistemit të drejtësisë, por e cenojnë edhe besimin e publikut në sundimin e ligjit”, tha ai.
Ndryshe, Kurti ka deklaruar se prokurorët kanë ardhur edhe më herët në Kryeministri dhe sipas tij ta shohim a guxojnë ata të vijnë tani.
Kurti po ashtu ka deklaruar se zgjedhja e Blerim Isufajt në postin e kryeprokurorit të Shtetit nënkupton se s’ka shpresë për drejtësinë kosovare.
Kurti nga ana tjetër, ka shmangur disa herë ftesën për intervistim nga Prokurorinë dhe ka shprehur gatishmërinë për të pritur prokurorët në zyrën e tij për të diskutuar çështjen./teve1.info
