Kryesuesi i Këshillit Prokurorial të Kosovës, Ardian Hajdaraj ka reaguar ndaj deklaratave të kryeministrit Albin Kurti për ftesën ndaj tij, lidhur me rezervat shtetërore.
Hajdaraj ka thënë se nuk i komentojnë deklaratat politike, por shtoi se para ligjit të gjithë janë të barabartë.
“Sa i përket deklaratave të kryeministrit nuk i komentojmë deklaratat politike. Mund të them se kemi reaguar shpesh nga sulmet që janë bërë me deklarata politike, nuk kam çka të shtoj, jeni të njoftuar se sot kryeprokurori Isufaj ka konferencë për shtyp. Ai do të përgjigjet më në detaje, mirëpo edhe mund të shtoj, se KPK i jep mbështetjen e plot Prokurorisë Speciale në zbatimin e mandatit të plotë kushtetutës, të gjithë janë të barabartë para ligjit”, tha Hajdaraj.
Ndryshe, Kurti ka deklaruar se prokurorët kanë ardhur edhe më herët në Kryeministri dhe sipas tij ta shohim a guxojnë ata të vijnë.
Kurti po ashtu ka deklaruar se zgjedhja e Blerim Isufajt në postin e kryeprokurorit të Shtetit nënkupton se s’ka shpresë për drejtësinë kosovare.
Kurti nga ana tjetër, ka shmangur disa herë ftesën për intervistim nga Prokurorinë dhe ka shprehur gatishmërinë për të pritur prokurorët në zyrën e tij për të diskutuar çështjen.
