Shtetet e Bashkuara të Amerikës (SHBA) kanë parë indikacione të hershme që sugjerojnë se rrëzimi i avionit të kompanisë ajrore të Azerbajxhanit këtë javë në Kazakistan mund të jetë shkaktuar nga sistemet ruse të mbrojtjes ajrore, tha Shtëpia e Bardhë.
“Ne kemi parë disa indikacione të hershme që me siguri do të tregonin mundësinë që ky avion të ishte rrëzuar nga sistemet ruse të mbrojtjes ajrore,” tha zëdhënësi i Këshillit të Sigurisë Kombëtare të Shtëpisë së Bardhë, John Kirby.
Ai në një konferencë sot për media, tha se hetimi është ende në vazhdim dhe po kryhet bashkërisht nga autoritetet në Kazakistan dhe Azerbajxhan, duke shtuar se SHBA kishte ofruar ndihmë me hetimin, shkruan kp.
MSNBC më herët gjatë ditës ka cituar dy zyrtarë ushtarakë sipas të cilëve Rusia gabimisht identifikoi aeroplanin si një dron ukrainas dhe më pas e rrëzoi duke përdorur sistemin e mbrojtjes ajrore.
Avioni u rrëzua të mërkurën pranë Aktau në Kazakistan, duke lënë 38 të vdekur dhe 29 udhëtarë mbijetuan fatmirësisht.
Zyrtarët azerbajxhanas duke folur për Anadolu ia atribuuan rrëzimin një sistemi raketor rus.
Përplasja ndodhi mes aktivitetit të mbrojtjes ajrore ruse kundër dronëve ukrainas dhe bllokimi i GPS u zbulua në rajon.
Kremlini ka thënë se nuk do të komentojë rrëzimin e aeroplanit azerbajxhanas derisa në përfundim të hetimeve.
