Përmes njoftimit, MPJD ka bërë të ditur se fillimisht ajo është takuar me kryetarin e Federats Izraelite të Odës Ekonomike të Izraelit, Uriel Lynn dhe anëtarë të tjerë të Odës.
Gjatë këtij takimi është biseduar lidhur me mundësitë që ofron Kosova për investime të huaja, potencialit të madh dhe mundësive të bashkëpunimit.
“Gjatë takimit u bisedua rreth mundësive që ofron Kosova për investime të huaja, potencialit të saj të madh dhe mundësive të bashkëpunimit mes dy vendeve, në fusha të ndryshme me interes të përbashkët dhe veprimeve të planifikuara nga Qeveria e Kosovës për të nxitur bashkëpunimin mes ndërmarrësve kosovarë dhe izraelit”, thuhet ndër tjerash në njoftim.
Tutje, delegacioni kosovar ka vizituar edhe Universitetin “Bar Ilan” në Tel Aviv.
Sipas njoftimit, me përfaqësues, profesorë e studentë të universitetit u bisedua rreth mundësive për vendosjen e një bashkëpunimi mes universiteteve të Kosovës dhe atij izraelit.
“Në kuadër të fakultetit të muzikologjisë, ministrja Gërvalla bisedoi me grupin e studentëve me nevoja të veçanta të këtij universiteti, rreth ofertës së universitetit dhënë këtyre studentëve dhe sfidave të tyre. Biseda u përmbyll me pyetje të studentëve rreth Kosovës dhe një koncert të shkurtër. Biseda dhe takime u zhvilluan edhe me fakultetet e inxhinierisë si dhe institutin e nanoteknologjisë. Si nga universiteti izraelit, ashtu edhe nga delegacioni i Kosovës u theksuan mundësitë për një bashkëpunim të ngushtë në të gjitha fushat”, njofton ndër tjerash MPJD.
Ndërkaq, dita e parë e vizitës u përmbyllë me takimin e Gërvallës me organizatën joqeveritare “Brithright Taglit” dhe me një darkë punë ku ishin ftuar “gra prominente izraelite si Dana Ëeiss, gazetare, Avital Leibovich, Granit Almog – Bareket, etj”.
Ndryshe, delegacioni i Kosovës gjatë së nesërmes do të takohet me ministrin e Punëve të Jashtme të Izraelit Yair Lapid, kryetarin e qytetit të Jerusalemit, kryetarin e grupit të miqësisë Izrael-Kosovë në parlamentin izraelit, kryetarin e komisionit parlamentar për punë të jashtme dhe mbrojtje të parlamentit, ministrin e Jerusalemit dhe trashëgimisë dhe përfaqësues të tjerë të jetës politike në Izrael.
Takimet e ditës së nesërme fillojnë me vizitën e ministres Gërvalla në Qendrën Përkujtimore Botërore të Holokaustit Yad Vashem./teve1.info/
