Nga 1 shkurti të gjitha barnat në farmacit në Kosovë do të kenë të njëjtin cmim. Kjo pasi ministri i Shëndetësisë i hapi rrugë jetësimi të ligjit përmes nënshkrimit të listës finale. Kështu mbi 2900 produktet do të kenë çmim të njëjtë.
Blerja e barnave të njëjta me çmime të ndryshme, po i vjen fundi.
Nga 1 shkurti i vitit të ardhshëm qytetarët do të kenë mundësinë në të gjitha barnatoret, të blejnë me çmim të njëjtë produktet mjekësore.
Këtë e bëri të ditur Ministri i Shëndetësisë Arben Vitia, i cili nënshkroi listën finale të barnave me çmime të unifikuara.
“Sot nënshkrova listën finale që i hap udhë jetësimit të Ligjit për çmimet e unifikuara të Barnave.Për herë të parë, barnat do të jenë me çmime të njëjta kudo dhe më të ulta sesa tani. Në disa nga barnat, çmimet janë ulur 5 deri në 10 herë”, ka deklaruar ai.
Kështu, mbi 2 mijë e 900 produkte medicinale do të mund të blihen me çmim të njëjtë kudo në Kosovë.
“Omeprazoli i cili përdoret për dhimbje të lukthit kushtoi 5.80 cent në njërën prej barnatoreve këtu në Prishtinë. Por së shpejti me ligjin e ri për unifikimin e barnave kjo barnë do të kushtojë vetëm 1.94 cent”.
E qytetarët po shpresojnë që ky ligj do të zbatohet nga farmacitë në vend.
“Njëri pension nuk na del pension mu e plakës. Më së paku 85 eruo i përdori barna në muaj. Ishalla bohet deri te bohet nuk besoj se po premtoj çka mos por kurgjo nuk po realizojnë”, ka deklaruar qytetari, Ragip Krasniqi.
“Ishalla realizohet çfarë kanë thënë e dyta që në këto barnatore hiq me larg se një javë dite, e njëjta barnë asnjë vend nuk është njëjtë,nuk është diferencë e madh por lëvizë çmim. Pra kjo është shumë mirë për neve”, ka thënë qytetari, Gafurr Bytyqi.
Edhe nga Shoqata e Pacientëve e kanë mirëpritur ligjin për unifikimin e çmimeve të barnave.
“Parimisht është një ligj i mirë që ju ka dashtë qytetarëve për shkak së blerja e një barne, për shkak se blerja e një barni në një vend ndryshe e në tjetrin ndryshe tregon për një abuzim me pacientë dhe unë dua që farmacitë të shihen më shumë si institucione shëndetësore jo si biznese. Faktikisht që lëvizë çmimi aq shumë tregon farmacist më shumë i kanë trajtuar pacientët në këndin e biznesit se sa shëndetit”, ka deklaruar Besim Kodra nga kjo shoqatë.
Kujtojmë që në vitin 2019 në Kosovë ishte miratuar një udhëzim administrativ për unifikimin e barnave por atëkohë nuk gjeti zbatim në barnatoret në vend.
