Një person është gjetur i vdekur në shtëpinë e tij në fshatin Veli Breg në Zubin Potok të hënën ka bërë të ditur Policia e Kosovës.
Sipas PK-së, informacioni për një person që dyshohet të jetë i vdekur ka ardhur nga Qendra e Mjekësisë Familjare në Zubin Potok, dhe pas shkuarjes në vendin e ngjarjes nga njësitet përkatës, është konstatuar vdekja e këtij personi.
“Njësitë relevante policore së bashku me stafin mjekësor dhe zjarrfikësit kanë shkuar në vendin e ngjarjes, ku kanë hasur në viktimën e cila ndodhej e shtrirë në dhomën e një shtëpie banimi. Ekipi mjekësor ka konstatuar se personi është pa shenja jete”, thuhet në komunikatë.
Policia ka njoftuar se lidhur me rastin është njoftuar Prokurori i Shtetit i cili ka udhëzuar që rasti të iniciohet si “Vdekje e dyshimtë”, ndërsa trupi i pa jetë me urdhër të Prokurorit është dërguar në Institutin e Mjekësisë Ligjore për obduksion.
