Medica Gjakova dhe Instituti për Hulumtime dhe të Drejtat e Njeriut kanë lansuar projektin për mbështetje të të mbijetuarve të dhunës seksuale gjatë konfliktit në Kosovë.
Siç bëhet e ditur nga këto dy organizata, kjo iniciativë synon t’u ofrojë atyre mbështetje gjithëpërfshirëse dhe të promovojë drejtësi për ata që ende po luftojnë me pasojat e dhunës.
Një mbijetuar e dhunës seksuale ka rrëfyer përjetimin dhe traumën e përjetuar gjatë asaj periudhe, teksa ka thënë se shpesh ndihet e izoluar dhe e turpëruar se do të më gjykohet nga komuniteti dhe familja.
“Turpi më bënte të heshtja dhe më ka penguar gjatë të kërkoj ndihmën dhe mbështetjen që më nevojitej”, ka rrëfyer kjo e mbijetuar emër i njohur për organizatat.
Sipas saj, raportimi i përvojave të tyre dhe kërkimi i drejtësisë ka qenë i mbushur me sfida e sistemi ligjor, shpesh, thotë ajo, se dështon të sigurojë mbështetjen dhe ndjeshmërinë që të mbijetuarit kanë nevojë.
Sipas këtyre dy organizatave, vetëm 1 mijë e 650 nga rreth 20 mijë të mbijetuar/a kanë fituar statusin zyrtar si të mbijetuar/a të dhunës seksuale të lidhur me konfliktin në Kosovë.
Medica Gjakova dhe IHDNJ thonë se projekti “Vetëdijesim, drejtësi dhe reparacion për të mbijetuarat e dhunës seksuale”, është duke u realizuar në një periudhë kohore 15-mujore dhe ka si qëllim mbështetje për 40 të mbijetuar/a, përfshirë edhe anëtarët e familjeve të tyre.
Ky projekt që ka marr mbështetje nga Bashkimi Evropian, përmes Programit të Kombeve të Bashkuara për Zhvillim (UNDP) synon të ofrojë ndihmë përmes procesit ligjor për kompensim dhe drejtësi, si dhe përmes grupeve mbështetëse për trajtimin e traumave, fuqizimin ekonomik dhe ngritjen e vetëdijes.
Ndërkohë, një i mbijetuar tjetër i dhunës seksuale ka thënë se jeta e tij pas përjetimeve, ka ndryshuar thellësisht.
“Unë nuk jam më personi që kam qenë. Unë jetoj me frikën e vazhdueshme se të tjerët mund të mësojnë se çfarë më ka ndodhur, dhe më rëndon turpi i lidhur me të mbijetuarit e dhunës seksuale. Këto ndjenja frike dhe turpi krijojnë dyshime për aftësinë time për të ecur përpara dhe për të jetuar një jetë normale,” tha ai.
