Ligjet që mundësojnë anëtarësimin e Kosovës në Zonën Unike të Pagesave në Euro kanë përfunduar në Gjykatën Kushtetuese. Kështu Kosovës iu ka shtyrë procedura për anëtarësim në SEPA. Ekonomistët thonë se përfitimet e vendit do të ishin të mëdha me anëtarësimin në ketë organizatë.
Në seancën e Kuvendit të mbajtur më 5 dhjetor, u miratuan tri ligje të rëndësishme që mundësojnë anëtarësimin e Kosovë në Zonën Unike të Pagesave në Euro (SEPA).
Por ligji për pagesa, për parandalimin e pastrimit të parave si dhe luftimin e terrorizmit përfunduan në Gjykatën Kushtetuese me iniciativën e Partisë Demokratike të Kosovës.
E për këtë ka reaguar edhe zëvendëskryeministri Besnik Bislimi i cili ka thënë se kjo do të shkaktojë Kosovës humbje të mëdha.
“Ligjet janë të parapara të sjellin më shumë transparencë financiare në vend, përafrim me tregun e Bashkimit Evropian si dhe përfitime të prekshme për qytetarët. Anëtarësimi në SEPA do të sjellë dhe një ulje të kostos së pagesave ndërkufitare deri në 55 milionë euro në vit. Ato janë një lehtësim i madh për familjet që pranojnë para nga të afërmit jashtë vendit dhe për bizneset që operojnë me partnerë ndërkombëtarë. Pra PDK-ja po ka qëllim që t’i dëmtojë qytetarët dhe bizneset në koston e të paktën 55 milionë eurove në mënyrë direkte në vit”, tha Bislimi.
E që Kosova do të këtë përfitime të mëdha në aspektin ekonomik e thotë edhe eksperti i ekonomisë, Safet Gerxhaliu.
“Një nga shtyllat kryesore që e mban Kosovën në aspektin ekonomik, janë remitancat dhe diaspora, dhe vetë eliminimi i pengesave dhe barrierave për transfer parave është një vlerë e shtuar. Në këtë drejtim besoj përftimet në një anëtarësim janë të një rëndësie strategjike. Efektet negative janë se këto bllokime i pengojnë proceset integruese e ngadalësojnë procesin e anëtarësimi e Kosovës në familjen evropian. Në fund të fundit në qoftë se do të kemi anëtarësim në SEPA- nuk do të jetë fitore e një partie politike por e mbarë Kosovës dhe në veçanti një kontribut për diasporën pasi në qoftë se kostoja e ndihmave pë Kosovën e kap vlerën 55 milionë euro, shumë më udhës ato para të mbesin tek diaspora”, Gerxhaliu.
Edhe avokati, Ardian Bajraktari i jep të drejtë opozitës, mirëpo ka një propozim për ta.
“Vlerësojë që kanë vepruar të drejtës që ja garanton kushtetuta, sa përket ligjeve sepcifikisht dua të them se hartimi i legjislacioni duhet me u siguru që me qenë proces sa me transparent dhe gjithëpërfshirës sidomos ligjeve të tilla qoftë që jetësojnë reformave, apo ligje anëtarësimin në mekanizma ndërkombëtar”, tha Bajraktari.
Përveç këtyre 3 ligjeve PDK ka dërguar në Kushtetuese edhe 13 ligje të tjera.
