Vetëm sot u publikua një video në rrjete sociale, ku shihet se disa qenë endacakë u vërsulen një të riu afër stacionit të autobusëve në Prishtinë.
Raste të tilla ka pasur edhe ditëve më parë.
Lidhur me këtë, ka reaguar njohësi i çështjeve të emergjencave dhe njëherësh Drejtor Ekzekutiv i Qendrës Kërkimore për Politika të Sigurisë (SPRC), Tahir Ahmeti.
Ahmeti ka thënë se sfidat e kohëve të fundit në disa qytete të Kosovës, e sidomos në Prishtinë është cenimi i sigurisë së qytetarëve nga qentë endacakë.
Sipas tij, çështje prioritare e shtetit duhet të jetë siguria e përgjithshme e qytetarëve.
“Sfida e kohëve të fundit në disa qytete të Kosovës, e sidomos në Prishtinë është cenimi i sigurisë së qytetarëve nga qentë endacak. Si çështje prioritare e shtetit duhet të jetë siguria e përgjithshme e qytetarëve. Në rastin e sipërpërmendur të qenve endacak në Prishtinë, përgjegjësia e veprimit bie mbi qeverinë komunale”, ka shkruar ai në një postim në Facebook.
Ahmeti thotë se duhet veprime urgjente, pasi siç u shpreh ai po cenohet dhe rrezikohet shëndeti dhe siguria humane e qytetarëve.
“Duhen veprime urgjente, sepse po cenohet dhe rrezikohet drejtpërdrejt shëndeti dhe siguria humane e qytetarëve. Çdo arsyetim është i pa qëndrueshëm dhe çdo vonesë vetëm sa po shkakton lëndime dhe trauma të thuajse përditshme të qytetarëve nga qentë endacak”, ka përfunduar ai. /teve1.info/
