Zëvendëskryeministri i Kosovës, Besnik Bislimi ka deklaruar se Qeveria e Kosovës dënon përpjekjet e autoriteteve serbe për të ndaluar donacionin e dedikuar për subvencionimin e bujqëve shqiptarë në Preshevë, Bujanoc dhe Medvegjë.
Bislimi ka thënë se Serbia nuk ka asnjë të drejtë të pengojë mbështetjen e Kosovës për shqiptarët e Luginës së Preshevës.
Më tej ai ka ftuar Bashkimin Evropian, OSBE-në, shtetet e QUINT-it dhe organizatat e tjera ndërkombëtare që të monitorojnë këtë situatë dhe siç është shprehur ‘të veprojnë për të mbrojtur të drejtat e shqiptarëve në Luginën e Preshevës’.
“Qeveria e Republikës së Kosovës dënon ashpër përpjekjet e autoriteteve serbe për të ndaluar donacionin e dedikuar për subvencionimin e bujqëve shqiptarë në Preshevë, Bujanoc dhe Medvegjë. Ky donacion, i inicuar me kërkesë të Këshillit Kombëtar Shqiptar, synon të përmirësojë jetën e komunitetit shqiptar dhe të mbështesë zhvillimin ekonomik të rajonit patur parasysh që edhe më tej komunat e Preshevës, Bujanocit dhe Medvegjës janë ndër komunat më të pazhvilluara në Serbi, ndër më të varfërat me papunësi të lartë e veçanërisht tek të rinjtë. Më 26 tetor 2024, Këshilli Kombëtar Shqiptar shpalli thirrjen publike për bujqit, duke pranuar mbi 1,178 aplikime. Ndërkohë, Ministria e Serbisë për të Drejtat e Njeriut dhe Pakicave dhe Dialog Social, ka ndërhyrë për të bllokuar këtë proces, duke kërkuar anulimin e vendimit për thirrjen publike.
Pikërisht më 10 dhjetor, në Ditën Ndërkombëtare të të Drejtave të Njeriut, shqiptarëve në Preshevë, Bujanoc dhe Medvegjë i është mbivendosur privimi nga mundësia e ndihmës nga Republika e Kosovës. Serbia nuk ka asnjë të drejtë të pengojë mbështetjen tonë për shqiptarët e Luginës së Preshevës. Ftojmë Bashkimin Evropian, OSBE-në, shtetet e Quint-it dhe organizatat e tjera ndërkombëtare të monitorojnë këtë situatë dhe të veprojnë për të mbrojtur të drejtat e shqiptarëve në Luginën e Preshevës. Qeveria e Kosovës qëndron e përkushtuar për të ndihmuar shqiptarët e Luginës së Preshevës dhe për të mbrojtur të drejtat e tyre dhe identitetin kombëtar, kulturor e gjuhësor”, ka shkruar Bislimi në Facebook.
Ndryshe, kryetari i Këshillit Kombëtar Shqiptar, Nevzad Lutfiu të martën ka njoftuar se ka marrë kundërpërgjigje nga Ministria për të Drejtat e Njeriut dhe Minoriteteve në Beograd në lidhje me konkursin për subvencionimin e kulturave bujqësore nga Fondi i Republikës së Kosovës.
Lutfiu: Serbia kërkon të anulohet konkursi për subvencionimin e kulturave bujqësore nga Kosova
