Të pafajshëm para Gjykatës Speciale për pengim dhe ndërhyrje në drejtësi, u deklaruan Hajredin Kuçi dhe Isni Kilaj. Për këtë të fundit, u ofrua dorëzani në shifër 30 – 40 mijë euro.
Paraqitjen fillestare e patën të hënën, secili veç e veç.
Së pari, ish ministri i Drejtësisë, Hajredin Kuçi, doli para gjykatëses së procedurës paraprake për akuzat për pengim dhe ndërhyrje në drejtësi.
Për to, Kuçi u deklarua i pafajshëm.
Në fjalën e tij para Gjykatës, Kuçi tha se aktakuzën e sheh si prekje të dinjitetit të tij.
Ish kryetari i komunës së Malishevës, ishte i fundit që doli para gjykatës.
Edhe ai u deklarua i pafajshëm.
Mbrojtja e tij e kundërshtoi masën e paraburgimit, derisa ofroi dorëzani.
“Mund të them që kam folur me familjen e z.Kilaj dhe ata mund të paguajnë më shumë për dorëzaninë nga 30 mijë në 40 mijë euro. Nuk do të jetë e lehtë për ata. Kilaj dhe familja e tij nuk janë të pasur, por familja e zgjeruar janë të gatshëm të kontribuojnë, të bëjnë sakrifica që të mbledhin një shumë kaq të madhe parash sepse i besojnë z.Kilaj”, tha avokati i Isni Kilajt, Iain Edwards.
Kjo çështje gjyqësore për pengim në drejtësi, vlerësohet si çështje për të mbuluar dështimin e prokurorisë në ndjekjen e krimeve të luftës.
“Në masë të konsiderueshme janë tentativë për të justifikuar mospunën edhe përgatitjen profesionale të prokurorisë të argumentimit të pretendimeve të tyre për sa i përket çështjeve për çka është themeluar Gjykata Speciale”, thotë avokati Bajraktari.
Kuçi e Kilaj, janë në një aktakuzë të përbashkët për pengim dhe ndërhyrje në drejtësi, me Hashim Thaçin, Bashkim Smakaj e Fahri Fazliun.
