Të paktën 29 persona janë vrarë, përfshirë katër pjesëtarë të stafit mjekësor, pasi sulmet ajrore izraelite goditën në një zonë afër një prej spitaleve të fundit që operon në veri të Gazës, thanë zyrtarët palestinezë.
Situata në dhe përreth spitalit Kamal Advan është “katastrofike”, tha drejtori i spitalit, Hussam Abu Safia. Në mesin e viktimave ishin pesë fëmijë dhe pesë gra, sipas listës së viktimave që ka spitali, e në të cilën ka pasur qasje Associated Press.
Spitali Kamal Advan në Beit Lahija është një nga spitalet e pakta që ende operon në provincën më veriore të Gazës, ku forcat izraelite po vazhdojnë ofensivën e tyre që pothuajse ka ndalur tërësisht këtë zonë nga qasja në ndihmë humanitare për dy muaj.
Ushtria izraelite ka mohuar se forcat e saj kanë sulmuar brenda spitalit dhe se operon brenda tij. Ushtria tha se në javët e fundit, “janë bërë përpjekje të koordinuara me organizatat ndërkombëtare për të transferuar pacientët, shoqëruesit e tyre dhe stafin mjekësor në spitale të tjera”.
Ky spital është sulmuar disa herë në dy muajt e fundit, kur Izraeli nisi një operacion të madh ushtarak në veri të Gazës kundër Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.
Në tetor, forcat izraelite bastisën spitalin, duke thënë se militantët strehoheshin brenda tij dhe arrestuan disa persona, përfshirë anëtarë të stafit. Zyrtarët spitalorë mohuan pretendimet e Izraelit.
Lufta e Izraelit kundër Hamasit ka shkatërruar zona të mëdha të Gazës dhe ka bërë që 90 për qind e popullsisë prej 2.3 milionë banorësh e kësaj enklave të zhvendoset disa herë.
Lufta nisi më 7 tetor 2023, pasi Hamasi sulmoi jugun e Izraelit duke vrarë afër 1.200 persona, shumica civilë, dhe duke rrëmbyer afër 250 të tjerë.
Ofensiva hakmarrëse e Izraelit ka vrarë më shumë se 44.000 palestinezë, mbi gjysma e tyre gra dhe fëmijë, sipas Ministrisë së Shëndetësisë në Gazë.
Izraeli, pa ofruar dëshmi, ka thënë se ka vrarë më shumë se 17.000 militantë./Radio Evropa e Lirë
