Ministrja e Ekonomisë, Artane Rizvanolli, ka thënë se sulmi terrorist në kanalin e Ibër-Lepencit në Varagë të Zubin-Potokut, e ka bërë të qartë se institucionet e Kosovës janë të përgatitura të përballojnë kërcënime të tilla.
Rizvanolli ka thënë se po punohet për zgjidhje afatgjatë të problemit për furnizim me ujë dhe energji elektrike.
“Ky sulm e bëri një gjë të qartë, institucionet e Kosovës dhe ndërmarrjet publike janë të përgatitura të përballojnë kërcënime të tilla, duke siguruar që furnizimi me ujë dhe energji të rikthehet shpejt dhe pa pasoja për qytetarët. Ibër-Lepenci është duke vazhduar punën me ekspertë dhe me përkrahje të ministrisë për ta bërë të mundur sanimin afatgjatë të kanalit, ndërkohë që po e monitoron bashkë me Ministrinë e Punëve të Brendshme dhe institucionet e sigurisë 24 orë në ditë lokacionin ku ka ndodhur sulmi dhe rrjedhën e ujit aty për të siguruar që zgjidhja teknike emergjente që është bërë, është e qëndrueshme deri në gjetjen dhe zbatimin e zgjidhjes afatgjatë”, ka thënë ajo në konferencë.
Rizvanolli tha tha se mbrëmë furnizimi në KEK ka arritur nivel optimal, ndërkohë që Ibër-Lepenci ka arritur të rrisë gradualisht rrjedhën e ujit në kanal.
“Përderisa po flasim të gjitha fabrikat e ujit janë në funksion dhe furnizimi është rikthyer në të gjitha komunat. Rasti i sulmit në kanalin e Ibër Lepencit tregoi qartë që siguria e furnizimit me ujë dhe energji është një komponent jetike e sigurisë kombëtare dhe rrezikimi i këtyre shërbimeve thelbësore rrezikon mirëqenien e qytetarëve, por edhe aktivitetin ekonomik e sigurinë kombëtare”, tha Rizvanolli.
Ajo ka falënderuar edhe Shqipërinë për gatishmërinë për të ndihmuar me furnizim me energji elektrike në natën e sulmit.
