Drejtori i policisë, Gazmend Hoxha, ka thënë se gjatë sulmit të mbrëmshëm në Ibër-Lepenc janë përdorur sasi të konsiderueshme e eksplozivit nga 15-20 kg.
Hoxha tha se në bazë të hetimeve deri tash dyshohet për një grup mirë të organizuar.
“Kemi të bëjmë me një grup mirë të organizuar që kanë njohuri dhe shkathtësi në përdorimin e mjeteve shpërthyese. Në bazë të hetimit të vendit të ngjarjes dyshohet se në këtë sulm është përdorur një sasi e konsiderueshme e eksplozivit 15-20 kg, e cila ka qenë e vendosur në një çantë të zezë dhe e cila është aktivizuar me detonatorë mekanikë përmes fitilit ndezës me djegie të ngadalshme. Si pasojë e këtij sulmi janë shkaktuar dëme të mëdha materiale dhe që është ndërprerë furnizimi me ujë të pijshëm për shumë zona, si dhe duke rrezikuar tejmase edhe me energji elektrike, por edhe rrezikun për pasoja më të rënda për avari në sistemin energjetik të Kosovës”, tha ai në konferencë për media.
Hoxha tha se këto sulme terroriste kanë për qëllim që të kërcënojnë sigurinë dhe rendin juridik të Kosovës.
