Në Prekaz nuk munguan as krerët e institucioneve të Kosovës. Ata ngrenë në qiell sakrificën e Jasharëve për lirinë dhe shtetin e Kosovës
Në Prekaz nuk munguan as krerët e institucioneve të Kosovës.
I pari që erdhi për të bërë homazhe në Prekaz, ishte kryetari i Kuvendit, Glauk Konjufca.
“28 nëntori është dita jonë e krenarisë, dita e flamurit tonë kombëtar. 28 nëntori është dita më përbashkuese e popullit tonë dhe popullit shqiptar. Kështu që gëzuar të gjithë shqiptarëve kudo që jetojnë 28 nëntorin – Ditën e Flamurit, e festofshim gjithmonë këtë ditë të lirë e krenar”, ka deklaruar ai.
Presidentja e vendit, Vjosa Osmani në ditën e festës së 28 Nëntorit, tha se liria dhe Pavarësia e Kosovës do të mbrohen në mënyrë të pakompromis.
“Edhe një herë për të treguar jo vetëm madhështinë dhe përjetësinë e sakrificës së Adem Jashari dhe familjes Jashari, por për t’u betuar para varreve të tyre prej vendit ku ata prehen përjetësisht që do ta mbrojmë në mënyrë të pa kompromis çdo cep të republikës sonë. Do ta mbrojmë në mënyrë të pakompromis lirinë dhe pavarësinë e Kosovës. Njëkohësisht do të bëjmë çmos që shqiptarët kudo që jetojnë ata të kenë të drejtat e garantuara”, tha Osmani.
Kurse kryetari i PDK-së, Memli Krasniqi kujtoi themeluesit e UÇK-së që po zhvillojnë betejën për drejtësi.
“Është edhe një festë e cila na emocionon sepse nuk i kemi në mesin tonë themeluesit dhe udhëheqësit e Ushtrisë Çlirimtare të Kosovës, Hashim Thaçin, Kadri Veselin, Jakup Krasniqin, Rexhep Selimin dhe shokët e tyre të cilët po e zhvillojnë edhe sot e kësaj dite, besoj shumë, betejën e fundit për drejtësinë dhe lavdinë e Ushtrisë Çlirimtare të Kosovës”, ka deklaruar Krasniqi.
Gjatë ditës qindra qytetarë erdhën për të bërë homazhe në Prekaz ku edhe u krijuan kolona.
