Sot kazermat e FSK-së hapën dyert për qytetarët. Në kuadër të “Ditës së Forcës” ata patën mundësi të shohin për së afërmi armatimin e ushtrisë së Kosovës. Të pranishëm ishin shumë fëmijë, të rinj e të moshuar. Ëndrra e të vegjëlve ishte të vishen në të ardhmen uniformën e ushtrisë së Kosovës.
Pjesëtarë të shumtë të Forcës së Sigurisë së Kosovës mëngjesin e së mërkurës kishin zënë pozicionet e tyre në Ditën e Forcës.
Kësaj radhe dyert e Kazermës “Adem Jashari” u hapën për t’ia prezantuar qytetarëve fuqinë ushtarake dhe armatimin të cilin e posedon Forca e Kosovës.
I gjithë oborri i kazermës guzhmonte nga zërat e fëmijëve të cilët kishin ardhur nga vendet e ndryshme.
Rrugën nga Skenderaj në Prishtinë e kishin marrë edhe familja Shabani.
Ëndrra e këtyre dy fëmijëve është që ta vazhdojnë traditën familjare ti bashkohen ushtrisë së shtetit.
“Kam dëshire të bëhem ushtar se axhi, gjyshi, e babi janë ushtar”, thotë Altin Shabani.
Nëna e tyre, Liridona Deliu tregon se nga erdhi ideja që këta të vishen me uniformë të ushtrisë.
“E kemi si lloj trashëgimi si nga familja jem si nga familja e burrit të dyja familjet kemi pjesëtar të FSK-së .Na çdo vit vijmë këtu edhe janë gëzua fëmija me ardhur këtu”, thotë ajo.
Interesimi i qytetarëve për të parë armatimin e FSK-së ishte i madh.
Madje këto ditë për dikë ishin ndër festat me të veçanta.
“Festa më e madhe në jetën teme për lirin e Kosovës, ditëlindjen e legjendarit, dalja e UCK-së, ditët më e madhja për mu është sot e nesër”, thotw Ramadan Qeriqi- qytetar
Krenar me arritjet e ushtrisë së Kosovës po ndihen ata.
“Normalisht që po ndihem shumë i lumtur, është një e arritur shumë e madhe kjo për të cilën kanë derdh gjak shumë njerëz, kanë humbur jetën shumë njerëz dhe normalisht jo vetëm unë por të gjithë ata që e dinë se çka kemi përjetuar në çfarë kushteve dhe rrethanave kemi jetu”, thotë qyetari Vehbi Asllani.
“I kënaqur jam për se tepri po e shohim një bukuri të mirë, po shohim një armatim që ka fillu mu zhvillu edhe ushtri e jonë inshalla nesër”, shprehet Isa Arifi.
E jo vetëm në Prishtinë, edhe në Kazermat në Mitrovicë, Istog, Gjilan, Prizren, Ferizaj dhe Pomozatin qytetarët patën mundësi të shohin për së afërmi armatimin e FSK-së.
“Dita e Forcës”, simbolizon themelimin e Forcës së Sigurisë së Kosovës.
