Në konferencë të përbashkët për media me ministren Lambrecht, Kurti ka thënë se ndihma e Gjermanisë në shtetndërtimin e Kosovës është e madhe, transmeton teve1.info.
Kurti gjithashtu deklaroi se në takim me ministren gjermane ka biseduar edhe për dialogun me Serbinë, duke vënë në theks njohjen reciproke për të sjellë normalizim të marrëdhënieve.
“Vizitat e ndërsjellta rikonfirmojnë marrëdhëniet e shkëlqyeshme ndërmjet dy vendeve tona dhe janë mundësi e thellimit të miqësisë. Gjermania jo vetëm që është aleat i joni por edhe shtëpia e mijërave shqiptarë. Gjermania ka dhënë kontribut të çmuar për çlirimin, pavarësimin e shtetit të Kosovës dhe u ka hapur dyert mijëra shqiptarëve. Biseduam edhe për aplikimin në shumë organizata ndërkombëtare dhe për liberalizimin e vizave”, tha Kurti.
Ndër të tjera gjatë konferencës, Kurti tha se “Dialogu duhet të jetë parimor për të sjellë normalizim të marrëdhënieve dhe një marrëveshje ligjërisht të obligueshme e që ka njohjen reciproke në qendër”.
