Partia në pushtet por edhe subjekte tjera politike kanë nisur fushatën paraelektorale me diasporën kosovare. Kjo ka bërë që të reagojë ambasadori gjerman, i cili tha se kanë informuar Ministrinë e Punëve të Jashtme dhe Diasporës se nuk do të lejojnë një gjë të tillë në tokën gjermane.
Partitë politike në Kosovë, ka shtuar aktivitetet me mërgatën në vendet e BE-së.
Por, takime të tilla me gjasë nuk do të ketë më në Gjermani.
Ky shtet ka bërë të ditur se do të kufizojë tubimet e partive politike që kanë të bëjnë me zgjedhjet e 9 shkurtit.
“Në lidhje me zgjedhjet e ardhshme të përgjithshme në Kosovë, ne kemi informuar Ministrinë e Jashtme dhe partitë politike për rregulloren tonë specifike. Kjo ka të bëjë me ngjarjet e fushatës për zgjedhjet në Kosovë që zhvillohen në tokën gjermane. Rregullorja parashikon ndër të tjera se leja nuk do të jepet nëse ngjarja e fushatës zhvillohet brenda një periudhe prej më pak se tre muajsh përpara datës së zgjedhjeve në vendin përkatës, ka shkruar ambasadori i Gjermanisë në Kosovë, Jorn Rohde.
Tëvë1 ka kërkuar të dijë nga Ministria e Punëve të Jashtme, se çfarë ankesash kanë marrë nga shteti gjerman, por që deri në publikimin e kronikës nuk ka pasur përgjigje.
Po ashtu, as partitë në vend nuk kanë qenë të qasshme për të treguar se a do të kenë më takime me mërgatën.
E ish-diplomati kosovar në Berlin, Blerim Canaj vlerëson se ka indikacione që Gjermania mund edhe t’ia ndalojë Kosovës mbajtjen e zgjedhjeve atje.
“Diplomatët të cilët janë deleguar atje, nuk po them të gjithë por shumica është parë që nga fillimi që janë dërguar më shumë diplomatë partiakë të cilët më shumë do të kenë interesim që të merren me zgjedhjet sesa të kryejnë punën për të cilën delegohen. Të ju them të drejtën shumë shtete këtë e marrin si ofendim edhe pse nuk e thonë për shkak se nuk mund ti ta shfrytëzosh pozicionin e till për krejt diçka tjetër”, ka thënë Canaj.
Këtë e sheh të dëmshme edhe politologu, Albinot Maloku i cili vlerëson se me këto veprime po keqpërdoren edhe asetet shtetërore nga ana e pushtetit.
“Keqpërdorimi i cili po e bën pushteti duke shfrytëzuar mundësinë e vet është i gjithanshëm dhe shumë përfshirës, kjo është jashtëzakonisht e dëmshme për Republikën e Kosovës, për sistemin juridik ligjor dhe shtetëror të vendit mirëpo për këtë pushteti aktual nuk është duke u mërzit dhe kjo është e dhimbshme, ka kepërdorim që nuk mbahet mend të ketë pasurn donjëherë në Republikën e Kosovës sikur tani”, ka thënë Maloku.
Televizioni ka kontaktuar edhe KQZ-në por që as këta nuk kanë kthyer përgjigje.
