“Urat çdo herë janë ndërtuar mes popujve, dhe kjo urë sot po e lidh Kosovën me perëndimin”, kishte deklaruar Lekaj në vitin 2018.
Katër vite pas, kjo urë po e lidh vet ish-ministrin e Infrastrukturës, Pal Lekaj, me një dyshim për aferë korruptive.
Ky akuzohet se ka nënshkruar marrëveshje në emër të dikasterit që drejtonte dhe ndërmarrjes “Bechtel & Enka”, për shtyerjen e afatit të punimeve të autostradës “Prishtinë – Hani i Elezit” pa e përcaktuar koston financiare, duke i lënë mundësinë kësaj ndërmarrjeje të kërkojë shumë shtesë nga shteti i Kosovës.
Tutje Prokuroria Speciale pretendon se Lekaj së bashku me zyrtarë tjerë ministror, Eset Berishën, Nebih Shatrin dhe Besim Tahirin, kanë injoruar Komitetin Drejtues Ndërministror dhe Njësinë për Implementimin e Projektit, duke zhvilluar dhe duke marrë vendime që lidhen me çështje të përcaktimit të kostos për zgjatjet e afatit të përfundimit të punimeve.
Për këto akuza, në shqyrtimin fillestar të katër të akuzuarit u deklaruan të pafajshëm.
Pas përfundimit të seancës, mbrojtësi i Lekaj përmbajtjen e aktakuzës, e konsideroi si tendencioze dhe të paargumentuar.
Me pajtim të palëve, shqyrtimi i dytë fillestar do të mbahet në qershor.
Raporti i gazetares Florijeta Dernjani.
