Pas pothuajse 7 vitesh nga krijimi, Gjykata Speciale do ta japë verdiktin e parë.
Por rasti për të cilin do të merret vendimi përfundimtar, nuk është në kategorinë e krimeve të cilat i ndjek kjo gjykatë.
Akuzat ndaj të cilave do të vendosë më 18 maj Specialja, janë vepra penale të pengimit të drejtësisë.
Pas 31 ditë gjyqi, këtë vendim të gjykatës do e presin ish krerët e OVL UÇK-së, Hysni Gucati dhe Nasim Haradinaj.
Për afro dy vite ata po qëndrojnë në paraburgim për akuzat pengim i personave zyrtar në kryerjen e detyrave zyrtare; frikësim gjatë procedurave penale, hakmarrje dhe shkelje e fshehtësisë procedurale.
“Sipas aktakuzës, së paku midis 7 dhe 25 shtatorit 2020, në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme, Gucati dhe Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve. Gucati dhe Haradinaj gjithashtu bënë akuza dhe komente nënçmuese kundër dëshmitarëve dhe në mënyrë të përsëritur shprehen synimin e tyre për të dëmtuar punën e Dhomave të Specializuara”, thuhet në aktakuzë.
Për këto akuza, Gucati dhe Haradinaj janë deklaruar të pafajshëm, fillimisht si të dyshuar e më pas si të akuzuar.
Ndaj tyre, Zyra e Prokurorit të Specializuar ka kërkuar dënim me 6 vite burgim dhe nga 100 euro gjobë.
Raporti i gazetares, Florijeta Dernjani.
