Banorët e lagjes “Kolovica e Vjetër” janë në hall më punimet e rrugës. Këta të fundit thonë se po u dëmtohen automjetet gjatë qarkullimit në atë pjesë. E në anën tjetër Komuna e Prishtinës ka një arsyetim për këtë.
Shenja e punimeve është këtu tash e ca muaj.
Por eksavatorët nuk janë të ndezur.
Banorët e lagjes “Kolovica e Vjetër” në Prishtinë, thonë që ka pasur ndërprerje të punimeve në këtë rrugë shpesh.
“Këta në këtë lagje janë tu punu që tri vite po në këtë pjese që janë thuajse tu e kry janë qe 6 a 7 muaj vinë punojnë 3 a 4 ore dy a tri dite e lanë ikin shkojnë”, shprehet Behram Krasniqi banor.
Ai ka një apel për komunën.
“Apelimi jem kish qenë me dal kryesia komunal edhe me ia dhanë një ultimatum brenda 10 ditëve nëse nuk shtrohet me u tërhjek kjo kompani me ardh një kompani serioze me ardh me kry këtë punë se na marum si banor”, shprehet Krasniqi.
Rruga me gropa dhe e dëmtuar po është shqetësuese edhe për këtë shofer të autobusit që po ia dëmton autobusin.
“ Na ka shkatërruar shumë se qe gjashtë muaj ja ka nisë me ndërtua këtë rrugë 600 metra rrugë sjanë në gjendje komuna me asfalltu e me ndreq vjen ni kamion me dy punëtorë vjen i bien në mëngjes e gjithë ditën e lume pesë metra si rregullojnë”, thotë Mehdi Arifi.
Për këtë problem Komuna e Prishtinës, ka një arsyetim.
“Realisht janë disa rrugë që ka pasur ngecje të punimeve janë disa operatorë ekonomik për të cilët komuna ka njoftua së i ka ndëshkua i ka penalizu se i ka tejkalua afatin e punimeve por ka edhe raste kur po hasin në ndërhyrje përtej asaj që është parashikua e pastaj kjo e komplikon çështjen”, shprehet zëdhënësi i komunës, Donat Lushaku.
Ai madje tregoi afatin se kur pritet të përfundojnë punimet.
“Sipas zotimit të drejtorisë së investimeve kapitale ideja është që të mbyllet brenda këtij viti, duke marrë parasysh që edhe koha edhe moti është në të mirë të punimeve”, u shpreh ai.
Punim po bëhen edhe në rrugë të ndryshme në kryeqytet.
Kronika e realizuar Fëllënza Krasniqi
