Që nga muaji korrik i vitit të kaluar, Albin Kurti e Aleksandar Vuciq nuk janë ulur përball njëri tjetrit, në kuadër të dialogut.
Por, një gjë të tillë do ta bëjnë të mërkurën në Berlin, me ftesë të kancelarit gjerman Olaf Scholz.
Në kryeqendrën gjermane është i ftuar po ashtu edhe i dërguari i posaçëm i Bashkimit Evropian për dialogun Kosovë-Serbi, Miroslav Lajçak.
Sa i përket agjendës së takimeve, është bërë e ditur se kancelari do të takoj Lajcakun e me pastaj do të ketë takime të ndara me kryeministrin e Kosovës Albin Kurtin e presidentin serb Aleksandar Vuciq.
Këtë e ka konfirmuar edhe ambasadori i Gjermanisë në Kosovë, Joern Rohde, në llogarinë e tij në Twitter.
“Kancelarja Scholz nesër do të presë kryeministrin Kurti dhe presidentin Vuçiq në takime të veçanta në Berlin. Takimi me kryeministrin @albinkurti do të pasohet nga një konferencë e përbashkët për shtyp në orën 16:00”, ka shkruar Rohde.
Në orët e mbrëmjes do të mbahet takimi jozyrtar Kurti – Vuciq, me ndërmjetësimin e emisarit Lajcak.
Këto takime që do të mbahen në Berlin, kandidati shqiptar i CDU për në Bundestag, Kolë Gjoka i sheh si pozitive dhe sipas tij është koha që Evropa të zgjohet.
“Unë besoj dhe jam i bindur që ky është vazhdim i politikës së deritanishme të qeverisë paraardhëse këtu në Gjermani. Gjithsesi unë besoj që është pak i vonuar, duhet të kishte qenë më aktive…momentalisht është koha për Evropën që të zgjohet kanë pasur kohë edhe para luftës në Ukrainë, kanë pasur kohën e mjaftueshme që të ndërhynë dhe të arrijnë deri aty sa ne të kemi një marrëveshje ndërmjet Kosovës dhe Serbisë”, tha Gjoka.
Njohësi i procesit të dialogut, Visar Xani, thotë se takimi i nesërm mund të jetë vetëm hap i parë drejt arritjes së marrëveshjes finale, për të cilën thotë se eksitojnë disa alternativa.
“Takimi i nesërm mund të jetë një hap i parë, një hap i parë për të avancuar drejtë një marrëveshje, por ju shumë të afërt, mbase kjo mund të jetë një marrëveshje e pritshme, një përgatitje terrenit për një marrëveshje finale, për një marrëveshje të përgjithshme… realisht në tavolina veç se qarkullojnë marrëveshje. Nuk është që janë pa alternativa dhe pa propozime si shtetet e Bashkuara të Amerikës, si Bashkimi Evropian ka disa alternativa. Kjo më shumë, kjo prolongimi vjen si pasojë e mosgatishmërisë së Kosovës për të dialoguar dhe për të qenë në ballë të dialogut për një marrëveshje finale me Serbinë”, tha Xani.
Por, para se të lëvizet drejt marrëveshjes finale, të pagjeturit, çështjet energjetike dhe çështja e targave janë disa nga temat të cilat do të trajtohen të mërkurën në kryeqendrën gjermane, Berlinin.
