Futbolli kosovar sot po e feston 6 vjetorin e pranimit në UEFA. 3 maj i vitit 2016 hyri në analet e historisë së sportit kosovar, kur përfundimisht Kosova theu izolimin prej dy dekadash e gjysmë, duke u bërë pjesë e familjes evropiane të futbollit.
28 vota të delegatëve në Kongresin e UEFA-s në Budapest ishin pro anëtarësimit të FFK-së, 24 kundër dhe 2 abstenime dhe kësisoj Kosova u bë anëtarja e 55-të e kësaj organizate.
Pas pranimit të Kosovës në UEFA, ish-kryetari Fadil Vokrri ju kishte drejtuar Kongresit duke thënë se kjo është një ditë historike për futbollin kosovar.
“Jam shumë i emocionuar t’iu drejtohem pasi sot Kosova është pranuar në UEFA, ky është një moment historik për futbollin kosovar. Një lajm i jashtëzakonshëm për futbollistët, sportdashësit. Betohemi se do të mbrojmë vlerat e futbollit. Faleminderit për votat që na bënë anëtaren e 55-të të UEFA-s”.
Por, këtë përvjetor Kosova dhe Federata e Futbollit e Kosovës, po e feston në një situatë shumë më të mirë.
Vetëm 6 vjet prej pranimit futbolli ynë mund të mburret me shumë të arritura.
Padyshim e veçanta është fakti që Kosova u bë vendi i parë në rajon që e solli sistemin VAR në një kohë rekorde, duke e bërë kështu kampionatin shumë më të vlerësuar dhe duke i hequr dilemat e mundshme.
Një tjetër e arritur e madhe që ka të bëjë drejtpërdrejt me klubet është edhe pjesëmarrja me 4 skuadra në Evropë. Kampioni, vendi i dytë dhe i tretë në tabelë si dhe fituesi i Kupës marrin pjesë në garat ndërkombëtare.
Ndërkohë edhe Superliga e Kosovës ka shënuar progres në ranglistën e UEFA-s, duke u pozicionuar më lart sesa vendet e rajonit si Shqipëria, Maqedonia e Veriut e Mali i Zi. /Tëvë1/
