Maliqi i ftuar në emisionin “Ditari” në Tëvë1, tha se askush nuk duhet të anashkalohet nga kjo festë muslimane.
“Festa e Bajramit u përket të gjithë besimtarëve, dhe kushdo që e ndjen veten besimtar të besimit Islam, ka hise në këtë festë të legjitimuar nga Krijuesi i Gjithësisë, prandaj askush nuk duhet të anashkalohet dhe të gjithë kanë të drejtë të festojnë, duke përfshirë këtu edhe ata që nuk kanë agjëruar”, tha Maliqi.
Sipas tij, muaji i Ramazanit përveç se është një muaj me sakrifica, ndihmon edhe të distancohemi nga çdo shprehi e keqe.
Duke filluar nga përkushtimi mes krijuesit dhe krijesës, tha Maliqi.
“Festa e Fitër Bajramit vjen në përfundimin e muajit të Ramazanit, një muaj plot sakrificë, një muaj me angazhim shpirtëror, si dhe për të iu përkushtuar raportit mes krijuesit dhe krijesës, por sigurisht që synimi kryesor ka qenë dhe do të jetë çdo herë të distancohemi nga çdo ves i keq, mendjemadhësia, urrejtja e xhelozia. Tanimë jemi në ditën e Bajramit, një festë për të gjithë besimtarët muslimanë kudo në botë”, tha tutje ai.
Maliqi tutje tha se ata njerëz që nuk kanë pasur mundësi ta agjërojnë Ramazanin për shkak të shëndetit, kanë vepruar drejt.
Sepse sipas tij, përparësi ka shëndeti e jo agjërimi.
“Mirëpo, ata që nuk kanë pasur mundësi ta agjërojnë Ramazanin për shkak të shëndetit, kanë bërë shumë mirë për shkak se Zoti i madhëruar nuk e ngarkon askënd përtej mundësive që mund t’i bartë, prandaj kur agjërimi bëhet shkak për ta rënduar gjendjen shëndetësore, përparësi i jepet shëndetit e jo agjërimit.
