Uashingtoni e Brukseli po insistojnë që palët të arrijnë një marrëveshje finale.
Por Prishtina dhe Beogradi akoma nuk duken të gatshme për një gjë të tillë.
E në Berlin, Kancelari i Gjermanisë, Olaf Scholz, do t’i pres në takim kryeministrin e Kosovës, Albin Kurti, dhe kreun e shtetit serb, Aleksander Vuçiq.
Në tavolinë me kancelarin gjerman, prezent do të jetë edhe ndërmjetësuesi i këtij procesi, Miroslav Lajçak.
Së palët janë larg një marrëveshjeje finale e thotë edhe njohësi i çështjeve politike, Leon Hartwell.
“Unë nuk e shoh që në një të ardhme të afërt Serbia do ta njoh pavarësinë e Kosovës. Nëse palët nuk janë të gatshme të zgjidhin një çështje kaq të thjeshtë siç është ajo me targat e makinave, atëherë si do të merren vesh për çështje të tjera më serioze. Presidenti serb, Aleksandar Vuçiq nuk e ka përgatitur terrenin në Serbi për njohje reciproke me Kosovën”, tha ai.
Hartwell ka përmendur edhe mundësinë e formimit të asociacionit të komunave me shumicë serbe.
Sipas tij, ky asociacion do të ishte i rrezikshëm për Kosovën .
“Unë mendoj qe formimi i asociacionit të komunave me shumicë serbe në Kosovë është e rrezikshme. Ka modalitete të tjera më kreative për ta forcuar rolin minoriteteve në një vend. Përmes formimit të asociacionit mund të krijohen struktura paralele, të cilat më pas mund ta pengojnë funksionimin e institucioneve qendrore. Ju e keni një shembull të tillë të rrezikshëm me Republikën Srpka në Bosnje dhe Hercegovinë”, shtoi Hartwell.
Së fundmi Presidenti serb, Aleksander Vuçiq ka pretenduar se e ka të pamundur të zhvilloj negociata me kryeministrin e Kosovës, Albin Kurtin.
Raporti i gazetarit Shpat Blakçori.
