KFOR do të kryejë një stërvitje të përbashkët me një nga njësitet rezervë të caktuara nga NATO duke filluar nga sot e deri në fund të tetorit.
KFOR ka bërë të ditur se një kontingjent prej 300 trupave nga Regjimenti Mbretëror i Yorkshiret i Britanisë së Madhe do të vendosen përkohësisht në Kosovë dhe do të kryejnë një sërë stërvitjesh të përbashkëta me trupat e tjerë të KFOR-it.
Gjithashtu, është bërë e ditur se synimi i stërvitjeve është testimi i procedurave ekzistuese për zbarkimin e trupave shtesë.
“Synimi i stërvitjeve është testimi i procedurave ekzistuese për zbarkimin e trupave shtesë dhe integrimin e tyre brenda misionit KFOR. Stërvitja përkrah gatishmërinë e KFOR-it për të reaguar ndaj zhvillimeve relevante të sigurisë, në mënyrë që të sigurohet zbatimi i vazhdueshëm i mandatit tonë të OKB-së – bazuar në Rezolutën 1244 të vitit 1999 të Këshillit të Sigurimit të OKB-së – për të kontribuuar në një ambient të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes në të gjithë kohën dhe në mënyrë të paanshme”, ka njoftuar KFOR përmes një komunikate.
KFOR ka thënë se pas përfundimit të stërvitjeve kontingjenti do të kthehet në Mbretërinë e Bashkuar.
“KFOR do të marrë të gjitha masat për të zbutur efektet në trafikun rrugor, të cilat mund të priten si rezultat i lëvizjeve së personelit ushtarak dhe automjeteve para dhe gjatë stërvitjeve”.
