Presidentja e Kosovës, Vjosa Osmani, ka deklaruar se kërkesat e presidentit Vuçiq nuk kanë rëndësi për Kosovën, pasi sipas saj ato nuk kanë prioritet interesin e qytetarëve por interesat destabilizuese të Serbisë.
Osmani, më tej ka shtuar se është e bindur që Vuçiq nuk është i interesuar në kthimin e serbëve në intsitucionet e Kosovës, por siç ka thënë ajo, ai po e bën këtë vetëm për të tërhequr vëmendjen e botës demokratike.
“Kërkesat e një presidenti të një shteti tjetër të cilat nuk bëhen në mirëbesim dhe nuk e kanë asnjëherë prioritet interesin e qytetarëve, por vetëm e vetëm interesat destabilizuese të Serbisë s’kanë rëndësi për Kosovën. Për më tepër unë jam e bindur se presidenti serb nuk është i interesuar që të realizohen ato që ai i paraqiti si kërkesa. Ai nuk është i interesuar në rikthimin e serbëve në institucione të Republikës së Kosovës. Unë jam e bindur se kur Vuçiq flet për rikthimin e serbëve në polici, gjyqësi, parlamentar dhe të tjera ai në fakt po i prezanton këto si fjalë e retorikë për të hequr vëmendjen e botës demokratike nga ajo që po ngjanë në të vërtetë. Që janë përpjekjet e tij të qeverisë së tij, ushtrisë së tij në trajtimin e vazhdueshëm të forcave paramilitare që kanë qëllim vetëm dhunën. Në asnjë moment nuk e besoj se Vuçiq është interesuar që serbët të kthehen në institucionet e Kosovës”, ka theksuar Osmani gjatë një ngjarje në Prishtinë.
Mirëpo, presidentja Osmani, ka thënë se pavarësisht kësaj institucionet e Kosovës duhet të punojnë hapur me qytetarët serb në mënyrë që ata të jenë prezent në të gjitha institucionet.
“Kjo nuk do të thotë që ne si institucione të Kosovës mos të punojmë hapur me të gjithë qytetarët tanë të nacionalitetit serb, në përputhje me procedurat e ligjshme ata të jenë prezent në të gjitha institucionet e Kosovës, gjë e cila ju takon me Kushtetutë dhe ligjet që kanë dal nga Pakoja e Ahtisaarit”, ka thënë ajo.
Ndryshe, javën e kaluar presidenti serb, kërkoi riintegrim të serbëve nga veriu në institucionet e Kosovës, shpalljen e zgjedhjeve të reja lokale në veri, kthimin e serbëve në Policinë e Kosovës dhe në gjyqësor, si dhe kërkoi tërheqjen e njësive speciale të Policisë së Kosovës nga veriu.
Ndërsa, të hënën, zëdhënësi i BE-së, Peter Stano, deklaroi se BE-ja, i mirëpret thirrjet e presidentit serb Vuçiq për serbët e Kosovës, për pjesëmarrje në zgjedhje në Kosovë dhe riintegrim të tyre në të gjitha institucionet e Kosovës nga të cilat u larguan në vitin 2022.
Kurse, gjatë ditës së martë, kërkesat e presidentit serb, Aleksandër Vuçiq ndaj Kosovës, i komentoi edhe kryeministri i Kosovës, Albin Kurti, i cili tha se kërkesat dhe masat e presidentit serb janë bërë nga një dëshprim, paraqesin jo racionalitet, si dhe sipas tij, nuk janë aspak paqësore por përkundrazi janë pjesë e fushatës agresive për konflikte të reja. /teve1.info/
