Kryeministri i Kosovës Albin Kurti ka thënë se roli i Qeverisë së drejtuar nga Lëvizja Vetëvendosje ka qenë dhe mbetet aktiv në mbrojtjen e grave në shoqëri.
Ai në mbledhjen e katërt të organizatës së Gratë për Vetëvendosje, ka thënë se shteti ka përgjegjësi të ndalojë çdo diskriminim dhe përjashtim.
“Pabarazia gjinore ka shkaqe strukturore e historike. Kjo lloj pabarazie na është trashëguar e më pas edhe është mirëmbajtur. Ç’ është e vërteta, e kanë mirëmbajtur burrat kryesisht. E kanë mirëmbajtur, sepse u është përshtatur, kështu ka qenë e është më lehtë për ta, por gjithnjë më e rëndë për gratë…25:08 Shteti ka përgjegjësi ta frenojë secilin diskriminim e përjashtim. Roli i shtetit me Qeverinë tonë ka qenë dhe është aktiv në mbrojtjen e grave. Kësisoj, kemi vendosur rëndësinë tek ato që pa drejtësisht konsiderohen më të parëndësishme,” ka thënë Kurti.
Ministrja e Drejtësisë, njëherësh kryetarja e Këshillit të Përgjithshëm të Grave të Vetëvendosjes, Albulena Haxhiu, ka thënë se Shërbimi Korrektues i Kosovës është konsideruar deri vonë si një institucion ku punësoheshin vetëm burra.
“Po e veçoj qëllimshëm Shërbimin Korrektues të Kosovës, sepse është konsideruar deri vonë si një institucion ku duhej të punësoheshin vetëm burra. Ne e kemi ndryshuar këtë dhe vetëm përgjatë kësaj periudhe janë punësuar 72 gra. Për ta bërë një krahasim nga viti 2018 deri në vitin 2021, kanë qenë vetëm 16 gra,” ka thënë Haxhiu./KP/
