Tash e disa vite këtij manifestimi botëror i është bashkangjitur edhe Prishtina, përmes aktiviteteve të organizuara nga shkolla e vallëzimit “Evolution Dance”.
Themeluesja e kësaj shkolle Dafina Rudi tha se shkolla e vallëzimit “Evolution Dance” tash e 12 vite është pjesë e Organizatës më të madhe botërore “Committee International du Danse- CID- UNESCO”.
Në një përgjigje për teve1.info, Rudi theksoi se edhe këtë vit, sikurse viteve të mëparshme kjo shkollë ka organizuar aktivitete vallëzimi për shënimin e kësaj dite.
“Qe 12 vite ne jemi pjesë e organizatës më të madhe botërore të vallëzimit, e cila është në UNESCO, dhe qe 12 vite, pra radhazi ne si shkollë ju bëjmë ftesa edhe shkollave të tjera të vallëzimit që të na bashkangjiten dhe e festojmë këtë ditë me performancat tona në sheshin e kryeqytetit”, tha ajo.
Edhe pse kjo shkollë kishte planifikuar që sot të mbante aktivitetet në nder të Ditës Botërore, të njëjtat i kishte mbajtur dje pasi që qytetarët fillojnë të largohen nga kryeqyteti për shkak të vikendit.
“Aktivitetet e shënimit të kësaj dite këtë herë do t’i mbajmë pak më herët për shkak të vikendit dhe festave që po lidhen këtë vit, por aktivitetet i kemi zhvilluar sipas programit vetëm se me datë pak më herët. Më 27 prill në mbrëmje kemi pasur workshop salsa, rueda dhe party, kurse me datë 28 në shesh, pra para Teatrit Kombëtar, duke filluar nga ora 17:00 kemi mbajtur organizimin, pra vallëzime të shkollave të ndryshme që kanë qenë të ftuara” shtoi tutje ajo.
Gjatë ditës së djeshme është zhvilluar aktiviteti me vallëzime të ndryshme i cili i është dedikuar fëmijëve dhe të rinjëve./teve1.info/.