Pas veprimeve të fundit të qeverisë së Kosovës në mbylljen e pesë komunave paralele serbe në katër komunat veriore, në grupe të ndryshme në “Telegram”, po bëhet thirrje për bllokimin e pikave kufitare, Bernjak, Jarinjë dhe pika të tjera që lidhin Serbinë me Kosovën. Njohësit e sigurisë thonë se këto veprime janë tendencë e Serbisë për të prishur situatën e sigurisë që aktualisht është e qetë në komunat veriore.
Mbyllja e komunave paralele serbe në katër komunat veriore, nuk u ka pëlqyer komunitetit serb.
Për këtë, tash e disa ditë në grupe të ndryshme në “Telegram”, po bëhen thirrje për bllokimin e pikave kufitare, Jarinjë, Bernjak, Merdarë, Koncul dhe Kula.
Sipas thirrjeve që televizioni i ka siguruar, aty thuhet se bllokada do të nis nga data 6 shtator, duke aluduar në mbrojtjen e serbëve në komunat veriore.
“Bllokada fillon më 6 shtator në të gjitha vendkalimet. Transporti ofrohet nga Beogradi, Novi Sadi, Smedereva, Kragujevci, Nishi, Krushevci, Vranja dhe Rashka. Ftojmë të gjithë vendasit dhe qytetarët tanë të Serbisë që duan të na përkrahin”.
E njohësit e sigurisë në vend, këto veprime po i shohin si tendencë të Serbisë për të krijuar tensione në komunat veriore.
Nuredin Ibishi thotë për televizionin se institucionet e Kosovës duhet të jenë në koordinim me faktorin ndërkombëtar, që të parandalohet përkeqësimi i gjendjes së sigurisë në terren.
“Këto paralajmërime vetëm sa e shtojnë të themi nervozizmin e e lidershipit serb që nuk po mundet në një formë të ndalë rrjedhën e shtrirjes të legalitetit të sovranitetit të institucioneve të Kosovës në veri. Unë mendoj se ne duhet të kemi një partneritet me ndërkombëtarët gjithashtu KFOR-in dhe EULEX-in, me qëllim të mbarëvajtjes së rendit dhe qetësisë si në brendi ashtu edhe kontrollit kufitar”, tha Nuredin Ibishi, njohës i sigurisë.
Ndërsa profesori i kriminalistikës, Fatmir Çollaku vlerëson se ky është një skenar nga Beogradi zyrtar që ta kategorizojë Kosovën si vend destabilizues.
“Janë një skenar të shumtë të Serbisë, njëri nga ata është edhe ky që me çdo kusht edhe çdo mënyrë më përpjek me destabilizu Kosovën edhe me paraqit imazhin destruktiv, imazh me tendencë destruktive që është imazh i keq për Kosovën në arenën ndërkombëtare. Sigurisht në kalkulimet e tyre është për të krijuar incidente të përshkallëzoj situatën, nga situata e qetë që është tani, në situatë jo të qetë dhe jo të sigurt”, tha ai.
Gjithçka sipas Çollakut pritet të përcillet nga Policia e Kosovës.
“Policia e Kosovës është në nivel të lartë të detyrës, çfarëdo qoftë sulmi eventual ose përpjekje për destabilizim, Policia e Kosovës është në nivel të detyrës”, tha Çollakul
Si organizator i kësaj proteste ka folur Kryetari i Asociacionit paralel të Qytetarëve të Qarkut të Mitrovicës, Rasha Rojeviq, i cili ka thënë se protestuesit nuk do të largohen nga pikat kufitare deri sa të largohet Policia e Kosovës nga veriu.
