Ministrja e Drejtësisë, Albulena Haxhiu, ka kërkuar nga partnerët ndërkombëtarë që t’i bëjnë presion shtetit serb në mënyrë që t’i dorëzojë kriminelët e luftës dhe terroristët që e kryen sulmin në Banjskë.
“Është e rëndësishme që partnerët tanë t’i bëjnë presion Serbisë, që ajo t’i dorëzojë kriminelët e luftës por edhe ata që kryen sulme terroriste, që cenuan rendin kushtetues dhe sovranitetin e Kosovës”, tha ajo në konferencë për media.
Ndërkohë, sa i përket sulmit terrorist, ministrja tha se Serbia duhet ta ketë të qartë se i vetmi shtet që ka të drejtë të hetojë këtë rast është Republika e Kosovës.
“Duhet ta ketë të qartë Serbia që i vetmi shtet që ka të drejtë të hetojë këtë rast është Republika e Kosovës, në këtë rast Prokuroria Speciale e Kosovës… Kërkesa e Serbisë është refuzuar dhe bie ndesh me nenin juridik që është për bashkëpunim ndërkombëtar”, deklaroi ajo.
Haxhiu, tha se tashmë Kosova dy herë radhazi iu është drejtuar Serbisë për këtë rast, por që nuk ka marrë përgjigje.
“Dy herë radhazi institucionet e Republikës së Kosovës përmes Ministrisë së Drejtësisë i janë drejtuar Serbisë, në këtë rast institucioneve përgjegjëse për ofrimin e provave që ndërlidhen me kryeterroristin Millan Radoiçiq, por edhe për terroristët tjerë, të cilët kanë marrë pjesë në këtë sulm terrorist. Serbia nuk ka kthyer përgjigje, por ajo se çfarë ka ndodhur së fundmi është që Ministria e Drejtësisë iu është referuar me kërkesë institucioneve të Republikës së Kosovës. Për arsye që janë çështje të ndjeshme nuk mund të jap më shumë detaje për publikun, por ajo kërkon prova për këtë rast”, shtoi ajo./teve1.info/
