Pas vendimit për përsëritjen e zgjedhjeve në qendrën 6 të vendvotimit në Tërnoc të Bujanocit, Kurti ka bërë thirrje që të votohet Shaip Kamberi, pasi sipas tij një përqindje e vogël e votave mund të ndryshojë situatën dhe shqiptarët mund të marrin një ulëse në Kuvendin e Serbisë, shkruan teve1.info
Tutje Kurti ka thënë se nevojiten vetëm edhe 650 vota, që Shaip Kamberi të vazhdojë përfaqësimin e shqiptarëve në Kuvendin e Serbisë.
“Një përqindje e vogël e votave mund të ndryshojë situatën dhe shqiptarët të mund të marrin një ulëse në Kuvendin e Serbisë. Pas vendimit për përsëritjen e zgjedhjeve në qendrën 6 të vendvotimit në Bujanoc, janë rritur gjasët që bartësi i listës së Koalicionit të Shqiptarëve të Luginës, z. Shaip Kamberi, të fitojë edhe një mandat deputeti. Potenciali votues i vendvotimit 6 është 1089 vota. Nevojiten 650 vota ose votimi i 60% të qytetarëve nga lista e votimit që z. Kamberi të vazhdojë përfaqësimin e shqiptarëve”, ka thënë Kurti.
Tutje Kurti ka folur për përfaqësimin e Kamberit në Kuvendin e Serbisë, duke thënë se ai kundërshtone ashpër para kuvendarëve serbë ndryshimin e pjesshëm të Kushtetutës së Serbisë.
“Deputeti Kamberi kundërshtonte ashpër para kuvendarëve serbë ndryshimin e pjesshëm të Kushtetutës së Serbisë, duke besuar se akti duhet të ndryshohet në tërësinë e tij. Ai përmendte si problematike preambulën e Kushtetutës, e cila përcakton Kosovën si pjesë të Serbisë. Në seancën e 29 tetorit 2020, z. Kamberi listonte faktet për masakrat e Serbisë në Kosovë dhe mohimin e fshehjen e krimeve nga shteti serb”, tha ai.
Kryeministri Kurti theksoi se Kamberi listonte faktet për masakrat e Serbisë në Kosovë dhe mohimin e fshehjen e fakteve nga shteti serb.
“Si deputet ai vazhdimisht avokonte për reciprocitet të drejtash të shqiptarëve të Preshevës, Medvegjës e Bujanocit me ato të pakicës serbe në Kosovë”
“Prandaj, ju ftoj që sot, më 28 prill, të gjithë ju më të drejtë vote, të shkoni në vendvotimin numër 6 në Tërnoc dhe të votoni për Koalicionin e Shqiptarëve të Luginës, të votoni për Shaip Kamberin”, përfundoi ai.
