Ish-kryeministri i Kosovës, Avdullah Hoti ka reaguar pasi Ministria e Industrisë ka nxjerrë udhëzim administrativ për kuotat në import.
Hoti ka thënë se ky udhëzim administrativ do të shkaktojë kaos në importe si dhe do të pamundësoj importin me çmime të lira, shkruan teve1.info
“Pasojat do t’i bartin qytetarët pasi çmimet e mallrave nga importi do të rriten, duke e rënduar koston e shportës së konsumit. Është e pakuptueshme se si disa nga odat ekonomike nuk po reagojnë për këtë anomali në politikat tregtare. Në vend të masave për mbështetje të prodhuesve vendor për të zëvendësuar mallrat nga importi, këta qeveritarë miratojnë udhëzime për administrim të importeve”, ka thënë Hoti.
Sipas tij, në këto katër vite qeverisje nuk ka pasur politikë ekonomike substanciale.
“Fatkeqësisht, në këto katër vite qeverisje nuk ka pasur asnjë politikë ekonomike substanciale. Si rezultat, deficiti tregtar është thelluar për 2.2 miliardë euro. Sikur të ishin zbatuar vetëm masat e Politikës Fiskale 2.0, e lënë në gjysmë në Qeverinë Mustafa në vitin 2017, situata ekonomike do të ishte krejt ndryshe”” ka theksuar Hoti.
